Charter Document - 02371560
| Charter Number: | 02371560 |
|---|---|
| Cartulary Title: | Canterbury 1193-1205 Volume 3 |
| Charter Language: | Latin |
| Charter Origin: | Religious |
| Charter Type(s): | Settlement |
| Date: | 1202 |
| Date type: | Internal, A.D., Calendar, Regnal |
| Resource Link(s): |
Reference Document for this Embedded Document |
Charter:
Universis sancte matris ecclesie filiis ad quos presentes litere pervenerint Willelmus dei gratia dictus abbas de Thama et magister j Walterus supprior Sancte Fretheswithe de Oxonia et Bartholomeus decanus de Doniton eternam in domino salutem Ad universitatis vestre notitiam volumus pervenire quod causa que vertebatur inter abbatem et canonicos de Nuteley et leprosas mulieres de Bradeleia super decimis de novalibus earum et de nutrimentis animalium suorum nobis a domino papa Innocentio tertio commissa in hunc modum conquievit Partibus siquidem in presentia nostra constitutis predicte leprose mulieres per priorem et procuratorem suum A coram nobis in iudicio per literas eorundem rati habitionis ad totam causam confirmatum omnem litem quam moverant predictis abbati et canonicis super decimis de novalibus suis et de nutrimentis animalium suorum eisdem abbati et canonicis coram nobis apud Thamam imperpetuum relaxaverunt ita quod de cetero omnes decimas suas de terris suis et de dominio suo in villa de Bradeleia tam de terris suis assartatis et de cetero imperpetuum assartandis quam de nutrimentis animalium suorum et omnium decimarum suarum prefatis abbati et canonicis imperpetuum quietas clamaverunt sicut ad matricem ecclesiam Omnium Sanctorum de Bradeleia de iure spectantes et easdem decimas predicte matricis ecclesie de Bradeleia plene et integre et sine difficultate et contradictione imperpetuum persolvent nec ipsos canonicos super predictis decimis ulterius vexabunt vel aliquam litem movebunt Prenominati vero abbas et canonici divine caritatis et pietatis intuitu antedictis leprosis mulieribus concesserunt tantummodo decimas provenientes de virgultis ipsarum leprosarum et de ortis earum contentis intra barras suas de domo que dicitur de profundis usque ad vivarium ipsarum libere et pacifice imperpetuum possidendas Unde ut ista compositio auctoritate domini pape coram nobis inter predictos canonicos et leprosas mulieres de Bradeley solempniter facta futuris temporibus firma et illibata permaneat eam presentis scripture testimonio et sigillorum nostrorum appositione confirmavimus Facta est autem hec compositio inter abbatem et canonicos de Nutteleia et predictas leprosas mulieres de Bradeley anno dominice incarnationis millesimo ducentesimo secundo presidente ecclesie Sarisbiriensi venerabili patre Herberto episcopo regnante illustrissimo rege Anglie Iohanne anno regni eius quarto octavo kal Iunii