Charter Document - 02371524

Innocentius episcopus servus servorum dei venerabilibus fratribus archiepiscopo Cantuariensi Cicestrensi et Elyensi episcopis salutem et apostolicam benedictionem Accedens ad apostolicam sedem G presbiter procurator nobilis viri H comitis Warenne ex parte ipsius de dilecto filio Cluniacensi abbate in auditorio nostro proposuit questionem quod cum in prioratum sancti Pancratii de Lewes per electionem monachorum et de assensu comitis preficiendus sit aliquis in priorem abbas ipse nuper vacante monasterio quendam ibi priorem intrusit pro suo arbitrio voluntatis petens pro comite antedicto intrusum penitus amoveri et ecclesiam per electionem fratrum suo interveniente assensu nichilominus ordinari Verum dilecti B et S nuntii et procuratores Cluniacenses et H supprior Sancti Pancratii qui ad prosequendam appellationem quam pro nominato priore interposuerat ad apostolicam sedem accesserat gravem replicantes contra ipsum comitem questionem ex parte abbatis Cluniacensis proponere studuerunt quod cum monasterium sancti Pancratii de Lewes ad Cluniacensem ecclesiam nullo mediante pertineat comes ipse ecclesiam de Cuninggeburg cum quibusdam pertinentiis eius ad Lewense monasterium pertinentem violenter invasit et quicquid ibi annone erat ad usus suos fecit in propria castella transferri in Hecham similiter in Karletone et Waltone maneriis monachorum servientes suos constanter sub pena demenbrationis indicens ne monachis quicquam de proventibus maneriorum redderent vel ab aliquo suorum hominum reddi aliquid paterentur Decimas preterea denariorum suorum que debet eidem ecclesie de Lewes per violentiam per quinquennium fere detinuit et litteras sigillatas ipsius ecclesie quas obligavit Iudeis pro pecunia quam accepit mutuo ad usuram renuit liberare Adiecit etiam ad maioris confusionis et malitie cumulum nuntios suos in Lewense capitulum mittere qui prefatos priorem et suppriorem et alios quicumque fovebant partem abbatis infra proximum quatriduum de terra eius iusserunt abscedere nisi vellent propriorum menbrorum mutilationem elapso quatriduo sustinere Minatus est etiam universis quod eos faceret fame perire si observarent interdictum cui abbas Cluniacensis Lewensem ecclesiam supposuerat propter violentiam dampna et gravamina que idem comes ipsi ecclesie inferebat Custodes quoque vacante prioratu ad portam monasterii sepe posuit qui ab eius ingressu nuntios Cluniacensis ecclesie et universos monachos Cluniacensis congregationis arcerent Hospites etiam et peregrinos cuiuscumque essent religionis vel ordinis non prius admitterent quam prestita fide firmassent se nullum mandatum ferre scripto vel verbo ex parte Cluniacensis ecclesie vel suorum Asserebant preterea abbatem ipsum iure suo usum in eadem ecclesia instituisse priorem sicut in aliis prioratibus ad Cluniacensem ecclesiam pertinentibus est hactenus sine contradictione qualibet observatum in quibus priores citra quamlibet electionem instituit et destituit etiam monachis inconsultis petentes institucionem prioris ab eodem abbate factam per favorem sedis apostolice roborari et comitem sepedictum ad ablata restituenda compelli et satisfactionem de illatis dampnis et iniuriis exhibendam Ceterum S et W monachi et nuntii prioratus peticioni annuebant comitis et pro parte votis Cluniacensibus concurrebant asserentes electionem prioris iure communi ad capitulum pertinere ibique requirendum assensum comitis ut patroni et instituto ab abbate Cluniacensi amoto postquam ibidem esset per electionem conventus ab ipso abbate alius institutus petebant non posse sine canonica causa destitui per eundem et quod abbas antiquo canone centum solidorum contentus non gravaret amplius prioratum Licet autem iidem monachi mandatum capituli non haberent ad institucionem tamen et destitucionem prioris iuxta premissum modum eorum obiectionibus est responsum et quod ultra summam prefixam nomine canonis non requirebatur in eodem prioratu aliquid ab abbate quamvis interdum pro multis et magnis necessitatibus ab ipso sicut ab aliis moderatum subsidium postularet Cum autem super hiis et similibus coram dilectis filiis nostris tituli sancte Prisce presbitero et P sancte Marie in via lata diacono cardinalibus quos eis dedimus auditores fuisset diutius disputatum qui nobis ea fideliter retulerunt quoniam ex confessione procuratoris iam dicti comitis intelleximus violentiam ab ipso in rebus ecclesie perpetrata licet non animo retinendi eum diceret hoc fecisse sed ut sic emendaretur in melius quod male factum fuerat ab abbate quamvis ex hoc secundum rigorem iuris a peticione sua potuisset saltem hac vice repelli post restitucionem tamen plenariam ablatorum et possessionem quietam et satisfactionem condignam de dampnis et iniuriis irrogatis si super questione premissa proponere quicquam voluerit ipsum vel procuratorem ipsius de benignitate sedis apostolice in auditorio nostro cum causam ipsam nolumus sicut nec expedit alii delegare decrevimus audiendum Monachis autem libertatem electionis petentibus cum et id a parte altera negaretur et ipsi mandatum sufficiens non haberent et propter probationum defectum ad presens intencionem suam probare non possent respondimus quod licet mirabile videatur si aliud ibi quam in aliis conventualibus prioratibus monasterio Cluniacensi subiectis debeat optinere coram nobis tamen audientiam concedemus cum ex parte conventus Sancti Pancratii sufficiens apparuerit procurator ita tamen ut priori quem abbas Cluniacensis instituit idem conventus reverentiam et obedientiam interim studeat exhibere Quocirca fraternitati vestre per apostolica scripta mandamus precipiendo quatinus nisi sepedictus comes a vobis monitus et ablata restituerit universa et de dampnis et iniuriis irrogatis satisfactionem exhibuerit congruentem vos eum ad id et monachos ad obediendum priori superius nominato omni contradictione et appellatione cessantibus per districtionem ecclesiasticam compellatis assignantes eis postmodum terminum competentem in quo si voluerint nostro se conspectui representent super premissis controversiis recepturi iusticiam et facturi nullis litteris obstantibus si que apparuerint preter assensum partium a sede apostolica impetrate Quod si omnes hiis exsequendis nequiveritis interesse duo vestrum ea nichilominus exsequantur Dat Laterani ii kal Iunii pontificatus nostri anno tercio