Charter Document - 02370597
| Charter Number: | 02370597 |
|---|---|
| Cartulary Title: | Canterbury 1193-1205 Volume 3 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1195 - 1198 |
| Date type: | Assigned |
| Resource Link(s): |
|
Charter:
Hub[ertus] dei gratia Cantuariensis archiepiscopus totius Anglie primas et apostolice sedis legatus omnibus ad quos presens scriptum pervenerit salutem in domino Notum fieri volumus universis et singulis quod cum controversia verteretur inter dilectos filios monachos de Rucford et Hubertum Hosatum clericum et consanguineum nostrum super decimis provenientibus ex terra quam idem monachi in parrochia ecclesie ipsius Huberti de Egrum excolunt quas idem Hubertus ad ecclesiam suam asserebat pertinere et super quibusdam iniuriis de quibus dicti monachi conquerebantur tandem intervenientibus amicis lis hoc modo coram nobis sopita quievit Monachi decimas quas memoratus Hubertus ad ecclesiam suam de Egrum pertinere dicebat scilicet decimas totius terre quam ipsi excolunt in parrochia eiusdem ecclesie toto tempore vite ipsius Huberti et vite dilecti filii Henrici Hosati patroni eiusdem ecclesie eidem ecclesie de Egrum sine omni conditione adiecta liberas et quietas concesserunt firmiter promittentes quod quamdiu idem Hubertus et Henricus Hosati vixerint nullam super eisdem decimis movebunt questionem Hubertus autem qui super iniuriis conveniebatur super hiis super quibus conveniebatur memoratis monachis congrue satisfecit sicque inter eos contentio hinc inde mota coram nobis finem accepit Ut igitur hoc in posterum nulli veniat in dubium prescripte compositionis formam presentis scripti serie et sigilli nostri appositione duximus testificandam Hiis testibus Galfrido de Bocland magistro Simone de Siwell magistro Willelmo de Sumercotes magistro Reinerio de Stanford Ricardo de Basingeham Roberto Mautalent et aliis multis