Charter Document - 02370587
| Charter Number: | 02370587 |
|---|---|
| Cartulary Title: | Canterbury 1193-1205 Volume 3 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1195 - 1198 |
| Date type: | Assigned |
| Resource Link(s): |
|
Charter:
Hubertus dei gratia Cantuariensis archiepiscopus totius Anglie primas et apostolice sedis legatus omnibus sancte matris ecclesie filiis ad quos presens scriptum pervenerit eternam in domino salutem Ex officii nostri debito securitati et paci virorum religiosorum duximus ut tenemur intendere et tam res quam redditus eorum rationabiliter obtentos auctoritatis nostre munimine confirmare et protegere Ea propter ad omnium volumus notitiam pervenire nos ex continentia cartarum dilectorum filiorum nostrorum Martini tunc tempore prioris Theford et eiusdem loci conventus necnon Rogeri Bigot comitis Norfolkie quas inspeximus manifestius advertisse eosdem monachos de Theford debere monasterio Rading eiusdemque loci conventui xl solidos annuatim solvendos eis apud Radinges vel custodi domorum suarum apud London ad Pascha quousque in certo competenti et securo redditu ubi utrique parti commodius visum fuerit illos eis assignent Quod si ecclesiam de Finchelefeld quam eisdem monachis de Theford memoratus comes Roger Bigot eorum patronus in elemosinam concessit a persona Radulfo de Diceto vacare contigerit antequam monasterio Rading et conventui loci eiusdem prefatus redditus competenter assignetur tunc in certa portione eiusdem ecclesie vel alibi predicti monachi de Theford conventui de Rading dictum redditum assignabunt ita quod idem conventus de Rading nichil aliud in eadem ecclesia possit vendicare nisi predictos xl solidos si ibi fuerint assignati Et de hoc prefatus comes Rogerus fideiussorem se constituit versus monachos de Rading sicut in carta sua quam prememoravimus noscitur contineri Ut igitur hec in posterum nulli veniant in dubium immo ex testimonio et confirmatione nostra maius optineant firmamentum ea sicut rationabiliter expressa sunt et confirmata presentis scripti serie et sigilli nostri appositione quantum in nobis est duximus confirmare et communire His testibus []