Charter Document - 02370575
| Charter Number: | 02370575 |
|---|---|
| Cartulary Title: | Canterbury 1193-1205 Volume 3 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1195 |
| Date type: | Internal, A.D., Feast |
| Resource Link(s): |
|
Charter:
Hubertus dei gratia Cantuariensis archiepiscopus totius Anglie primas et apostolice sedis legatus omnibus Christi fidelibus per episcopatum Wigorniensem constitutis eternam in domino salutem Sicut ex iniuncto nobis officio ea que saluti vestre novimus expedire vobis exponere sumus astricti sic vestre incumbit sollicitudini salubria monita nostra et mandata animo suscipere firmiori Considerantes igitur inopiam dilectarum monialium de Pinesleg devotionem vestram fratres et filii in domino cum omni sollicitudine duximus exhortandam quatenus eas propter earum honestam conversationem propter religionis sue immensitatem propter domus sue tenuitatem oculo pietatis et misericordie respicientes de bonis vestris temporalibus ad domorum suarum erectionem et ad ecclesie sue constructionem eis aliquid misericorditer conferre velitis Nec difficiles in hac parte vos exhibere debetis ubi pro terrenis celestia pro temporalibus eterna et pro caducis stabilia comparare potestis Nos autem de dei misericordia et gloriosi martiris Thome meritis confidentes uberius omnibus qui memoratis monialibus ad inopiam suam sublevandam aliquid de bonis sibi a deo collatis pie contulerint confessis et vere penitentibus decem dies de iniuncta sibi penitentia relaxamus Facta est autem a nobis hec indulgentia anno ab incarnatione domini mcxcv in festo beati Nicholai per quinquennium duratura Valete