Charter Document - 02370550
| Charter Number: | 02370550 |
|---|---|
| Cartulary Title: | Canterbury 1193-1205 Volume 3 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1198 - 1205 |
| Date type: | Assigned |
| Resource Link(s): |
|
Charter:
Sanctissimo patri et domino dei gratia sancte Romane sedis summo pontifici Hubertus permissione divina Cantuariensis ecclesie minister humilis tocius Anglie primas salutem et debitum cum prompta devotione et reverentia famulatum Gratias refero gratiarum largitori quod cum temporibus nostris eatenus invaluerit antiqui hostis versutia ut iniquitatis sui virus latius diffundens maiores in minorum depressionem incitaverit et oppressionem vos eorum relevationi et defensioni operam incessanter inpendentes efficacem de manu potentum pauperes eripitis et egenos Sane vir venerabilis Bernardus prior domus de Novoburgo et eiusdem loci conventus per indebitas oppressiones venerabilis fratris Eboracensis archiepiscopi qui a prima sui promotione eos persequi non cessavit multipliciter afflicti sunt et gravati qui per ipsum de novo a possessione cuiusdam ecclesie que usibus eorum et sustentationi pauperum extitit assignata violenter et nimis crudeliter sunt deiecti Ea propter pio ipsorum persecutioni compaciens affectu habito respectu ad eiusdem prioris persone idoneitatem valde commendabilem necnon ad dicti conventus opinionem que ipsos tam in hospitum susceptione quam in aliis caritatis operibus plurimum reddit deo sicut credo acceptos et populo velut fama puplica protestatur laudabiles sancte paternitati vestre cum ea qua possum affectione supplico quatinus aurem vestre pietatis piis eorum precibus si placet optentu mee supplicationis benignius in hac parte inclinare dignemini quatinus vestre benignitatis dulcedine recreati liberius et commodius post tantam oppressionem valeant respirare et consuetis caritatis operibus abundantius insistere Valeat sancta paternitas vestra in tempora longiora