Charter Document - 02370529
| Charter Number: | 02370529 |
|---|---|
| Cartulary Title: | Canterbury 1193-1205 Volume 3 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1193 - 1198 |
| Date type: | Assigned |
| Resource Link(s): |
|
Charter:
Universis sancte matris ecclesie filiis Hubertus dei gratia Cantuariensis archiepiscopus totius Anglie primas salutem in domino Sicut ex autentico scripto venerabilis fratris nostri Hugonis Coventrensis episcopi plene didicimus cum decanatus de Lich per varia fuisset menbra distractus plures in locis pluribus particulas habens et de bursa etiam episcopi quedam non sine difficultate percipiens predictus episcopus volens sicut iustum erat honori et utilitati ecclesie de Lich in posterum providere vice illarum portionum in predictum decanatum ecclesiam de Adbaldeston cum pertinentiis omnibus assingnavit decanis omnibus de Lich prout sibi succedent ita libere et quiete inperpetuum responsuram sicut unquam canonico de Eccleshal qui eam possederat dinoscitur respondisse ut scilicet ecclesia memorata de Adbaston fontem et cimiterium habeat suis limitibus distinguatur propriosque parochianos habens nec sepulturam nec cetera ecclesiastica aliunde mendicet Sicque in corpus decanatus memorati ecclesia predicta iure perpetuo convertatur ut decanatus et prebende manifesta et facilis distinctio perpendatur sicut ex predicto instrumento liquide constare poterit intuenti Nos igitur hanc piam et canonicam memorati fratris et coepiscopi nostri assignationem in scriptum redactam et auctoritatis eius patrocinio roboratam grato et benigno favore prosequimur et ne possit aliqua occasione in posterum infirmari eam sicut a predicto episcopo canonice confirmata est archiepiscopali similiter auctoritate confirmamus et sigilli nostri testimonio communimus Hiis testibus magistro Ricardo cancellario nostro Rannulfo thesaurario Saresberiensi magistro Simone de Siwell magistro Simone de Scalis magistro Willelmo de Neketun magistro Willelmo de Somercot magistro Gervasio magistro Helia Adam clerico