Charter Document - 02370439
| Charter Number: | 02370439 |
|---|---|
| Cartulary Title: | Canterbury 1193-1205 Volume 3 |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1193 - 1205 |
| Date type: | Assigned |
| Resource Link(s): |
|
Charter:
Hubertus dei gratia Cantuariensis archiepiscopus totius Anglie primas dilectis filiis decano et capellanis Dovorr salutem et bene dictionem Alias vobis in mandatis dedimus ut singuli vestrum parochianos suos homines scilicet de Dovorr qui decimas suas ecclesie sancti Martini ubi monachi degunt debitas in suarum detinent periculum animarum ad earumdem decimarum suarum solutionem moneretis et si opus esset per censuram ecclesiasticam districte cogeretis Set quia ut accepimus nichil vel minus quam oporteret super hoc hactenus actum est a vobis cum iam tempus advenerit quo idem parochiani vestri commodissime per subtractionem sacramentorum ecclesiasticorum a vobis poterunt ad hoc coartari vobis iterato mandamus et in virtute obedientie districte precipimus quatinus eosdem parochianos vestros ut predicte ecclesie sancti Martini et monachis ibidem deo servientibus decimas suas integre et plene sicut tenentur persolvant per sacramentorum huic tempori competentium subtractionem et aliis iustis modis quibus poteritis districtissime compellatis Sicque vos in huius mandati nostri executione habeatis ne debeatis a nobis vel de remissione redargui vel pro negligentia et contemptu gravius puniri Valete