Charter Document - 02370412
| Charter Number: | 02370412 |
|---|---|
| Cartulary Title: | Canterbury 1193-1205 Volume 3 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1193 - 1205 |
| Date type: | Assigned |
| Resource Link(s): |
|
Charter:
Hubertus dei gratia Cantuariensis archiepiscopus totius Anglie primas omnibus Christi fidelibus ad quos presens scriptum pervenerit salutem in domino Cum prona sit ad fallendum presens etas et bene instituta malitiose nitatur infirmare non immerito res et possessiones virorum religiosorum nostra studemus confirmatione munire quorum paci et securitati tenemur pro posse providere Quapropter predecessorum nostrorum bone scilicet recordationis Theobaldi Thome et Ricardi vestigiis inherentes dilectis filiis nostris monachis sancti Iohannis Colecestr omnes possessiones et elemosinas quas canonice sunt adepti vel inposterum adipiscentur in ecclesiis terris et decimis que tam de nemoribus et pascuis in agros arabiles conversis quam de aliis proveniunt seu in aliis quibuscumque rebus et possessionibus necnon consuetudines et libertates quas bone memorie rex Henricus eisdem monachis et monasterio suo concessit et bone memorie Kalixtus papa eis confirmavit sicut heedem possessiones elemosine decime consuetudines et libertates eis rationabiliter concesse sunt et auctenticis scriptis predictorum predecessorum nostrorum necnon prefati regis H et prenominati pape Kalixti confirmate ea qua fungimur auctoritate confirmamus et presenti scripto ac sigilli nostri appositione communimus statuentes ut sententia quam predictus dominus papa et prefati predecessores nostri archiepiscopi in perturbatores memorati monasterii vel possessionum eius dictaverunt firma permaneat et probata necnon sub interminatione anathematis inhibentes ne quis hanc nostre confirmationis paginam infringere vel ei ausu temerario contraire presumat Valete