Charter Document - 02370370

In nomine sancte et individue Trinitatis anno ab incarnatione domini mcxcvii Pro communi utilitate Cantuariensis ecclesie et Roffensis ecclesie de voluntate et assensu Ricardi illustris regis Angl factum est escambium de manerio de Lammedh cum pertinendis inter dominum Hubertum Cantuariensem archiepiscopum et priorem atque conventum iamdicte ecclesie Roffensis in hunc modum videlicet quod predicti monachi Roffenses auctoritate et assensu Gilleberti tunc Roffensis episcopi concesserunt predicto archiepiscopo et successoribus suis in perpetuum predictum manerium de Lammedh cum ecclesia eiusdem manerii et cum omnibus libertatibus et liberis consuetudinibus et cum omnibus aliis pertinendis suis tam in eodem manerio existentibus quam in Suwerc quam in socna de London salva predicto episcopo et successoribus suis medietate eiusdem socne in London Sed sciant omnes quod molendinum illud quod predicti monachi habent extra Suwerc supra Tamisiam versus orientem contra turrem Lond et mariscum quem habent in Gren quem Baldewinus Cantuariensis archiepiscopus eis dedit pro sede capelle beati Thome martiris et area circumiacente apud Lamedh non venerunt in hoc escambium sed eisdem monachis quieta remanserunt licet prior de a Lammedh consuevisset exitus inde percipere antequam hoc escambium factum esset et contra predictus archiepiscopus H dedit et concessit in escambium predicti manerii de Lamedh monachis ecclesie sancti Andree Roffensis totum manerium de Darent cum ecclesia et cum capella de Helles cum omnibus libertatibus et liberis consuetudinibus et omnibus aliis rebus ad ipsum manerium pertinentibus salvo iure spirituali in ipsa ecclesia predicto archiepiscopo et successoribus suis donec ipse vel successores sui illud de mera liberalitate episcopo Roffensi concesserit et unam bercariam in Clive que appellatur Estmers cum ducentis viginti ovibus cum terra certa in Clive que pertinet ad eundem mariscum et in eadem villa de Clive Heimericum Thomam Hagenildam viduam Ioscelinum Walterum bedellum Eilwinum Martinum Willelmum Adam et Eilmerum piscatorem cum terris quas tenuerunt et redditibus et omnibus servitiis et consuetudinibus suis sine aliquo retinemento ipsi archiepiscopo vel successoribus suis ita quod predicti monachi Roffenses habebunt in usus victualium suorum predicta escambia sicut prius habuerunt manerium et ecclesiam de Lamedh salvo iure episcopo Roffensi in ipso escambio sicut prius habuit in predicto manerio de Lammedh Et sciendum est quod idem archiepiscopus et successores sui warantizabunt ipsis monachis Roffensibus predictum manerium de Darent cum pertinentiis suis et predictam bercariam cum pertinentiis suis et predictos homines cum terris redditibus et servitiis suis et predicti monachi warantizabunt ipsi archiepiscopo et successoribus suis ipsum manerium de Lamedh cum pertinentiis suis Et sciendum est quod nec ipse archiepiscopus nec aliquis successorum suorum poterit dare alicui aut vendere aut escambire ipsum manerium de Lammedh aut aliquo modo a corpore archiepiscopatus sui alienare et similiter monachi Roffenses non poterunt dare aut vendere alicui aut escambire aut aliquo modo alienare a sua ecclesia Roffensi predictum manerium de Darent nec ecclesiam nec aliquod tenementum aliud de hiis que pro manerio de Lammedh in escambium receperunt Et ad maius escambii huius robur predictus archiepiscopus et omnes episcopi et universus clerus Anglie de assensu et voluntate domini regis sententiam excommunicationis intulerunt in omnes qui contra hoc venire presumpserunt et tam ipse archiepiscopus quam predicti episcopus et monachi Roffenses mutuis scriptis sigilla sua apposuerunt