Charter Document - 02361708

A touz cels qui verront et orront ces présentes lettres nous Humberz de Biaujeu chevaliers conestable de France sires de Montpancier et de Saint Morise tire ou aille et Ysabiaus conestablesse de France sa fame salut en nostre seigneur Nous faisons à savoir à tous présenz et à venir que nous à honorables homes au daien et au chapistre d'Aucuerre avons eschangié et baillié par lou titre de permutation tous nos homes et toutes nos fames lesquex et lesqueles nous aviens ou poveins ou deviens avoir à Eglini à Charbui à Pourrein et à Apoigni dont li non sont ci desoz nommez c'est à savoir à Eglini Guillaume Motin [] Après à Pourrein Maire de Pourrein fil feu Friant à Charbui Jehan Prieux lesquex homes et lesqueles fames nous baillons au diz daien et chapistres sers et serves de chief et de cors justisables exploitables et taillables haut et bas de condition de main morte et d'autre condition serve et baillons Jehan Gallé de tel condition comme il doit estre avec tout le droit que nous i aviens ou deviens ou poveins avoir au jour que ceste lettre fu faite A Apoigni les anfanz Estiene Lalemant [] lesquex homes et lesqueles fames d'Apoigni desus nommez et leur hoirs et leur sigances nous bailons au daien et au chapistre an la condition an l'estat et es redevances esquex nous les teneeins sanz riens retenir et touz les autres homes et toutes les autres fames lesquex et lesqueles nous aviens ou poviens ou deviens avoir es viles desus dites et an toutes les autres viles et an toute la terre dou chapistre d'Aucuerre avec toute la progeniée et la sigance de touz les homes et de toutes les femmes desus diz nommémant et généralmant si comme il est desus dit demoranz es viles et an la terre dou chapistre an tel manière que se aucuns des homes desus nomez que nous baillons pour sers ou de leur progenies ou de leur ségances s'en aloient fors de la terre dou chapistre des or en avant li dit daien et chapistres les pourroient suigre comme les leur quelque par que il alesseint Et leur baillons toutes les droitures corporex et non corporex que nous aviens ou poveins ou deviens [] avoir es viles et an la terre desus dites c'est à savoir à Eglini à Appoigni à Pourrein à Charbui et ausit à Lindri et ou finaige et es apertenances de ces viles et an toute la terre dou demaine de chapistre et toutes les choses que nous i aviens par héritaige ou par conquest ou en autre manière et toutes les rantes les choses et la partie que nous aviens acquises de noble home monseigneur Droon de Mellot chevalier lesquex il avoit ou povoit ou devoit avoir es viles devant dites c'est à savoir la mitié de sis muis huit setiers quatre bichez d'avoine à res à la mesure d'Aucuerre et la mitié de vint et trois solz neuf deniers tornois Après nous avons ausit eschangié audiz daien et chapistre une maison assise à Eglini et toute la vigne darriers ansamble toute la porprise devant et darriers qui furent Jehan Galé et Babelée sa fame lesquex choses nous avons acquis de Guillaume de Joigni escuier nostre fil Ysabiaus desus dite sauve à Babelée fame à celui Jehan la mitié de l'usfruit de la vigne et de la maison et de la porprise de la dite maison laquele mitié ladite Babelée fame Jehan Gale doit tenir tant comme ele vivra sans plus et après son déceis doit venir au chapistre devant dit lesquex choses acquises de Guillaume disoit le chapistre que nous ne Guillaumes ne les poveins tenir ainz les nos covenoit metre hors de nos mains si come il disoient derechief nous avons eschangié et baillié par ce meisme échange audiz daien et chapitre tous le sauvemant et tous les festaiges de Eglini et les mareschaucies d'avoines les sigances de deniers de vins d'avoines que nous aviens ou poviens ou deviens avoir au jour que ceste lettre fu faite à Eglini à Charbui à Lindri à Ruet à Huisseaus à Antuen à Saint Martin à Merri à Beiche et an toutes les villes et toute la terre dou demaine dou chapistre desus dit et doivent valoir les avoines d s mareschaucies des viles desus dites ses muis huit setiers et quatre bichez d'avoine à res à la mesure d'Aucuerre Après li sauvemanz dou vin doit valoir vint et sis muis de vin a la mesure d'Aucuerre Après la sigance des maréchaucies des avoines doit valoir vint et trois solz neuf denier et maille Après la some dou festaige de Eglini receuz an karome trante et cinq solz deus deniers tournois Après la sigance dou sauvemant dou vin huit solz Et se mains i avoit en toutes ces choses nous seriens tenu au parfaire et se plus i avoit il seroit au chapistre Et se il est ainsi que nous haiens fiez ou rière fiez et viles desus dites an choses que aucunes genz teignent de nous autres que celes que nous eschaingons au chapitre nous les retenons à nous et à nos hoirs à tous jours mais et tout le droit de fiez ou de rière fiez qui am poroient avenir à nous et nos hoirs Et est asavoir que an toutes les choses desus dites et an chacune par soi nous baillons et délivrons audit daien et chapitre toute la justise et la seignorie que nous i aviens ou poveiens ou deviens avoir an icels sans riens retenir à nous ne à nos hoirs Et toutes les choses desus dites nous avons échangiés audiz daien et chapitre à trente livres de rente que li évesques Guiz de Mellot évesque d'Aucuerre avoit seur la prooté de Saint Morise que il conquist et acheta des hoirs de Thoreite et a touz les autres conquez que fist cil évesques Guiz an la terre de Saint Morise de Chassi de Aillant de Boixereiles de Sarmeises et des apertenances de ces leus et à tous le conquez que cil évesques Guiz fit an la vile et est apertenances de Flori de Prées et des autres leus desus diz soit an bois an possessions an prez an terres an gaignaiges an grainges an tierces an vignes an cens an censives an costumes an hoes an gelines an pains an redevances an homes an tailles an main morte an prootez an rantes an justises an seignories et à touz droit corporex et non corporex de choses et de persones lesquex lidiz évesques Guiz avoit conquis et dom li estoit tenant quant is ala de vie à mort sanz riens retenir audit daiens et chapitre es leus desus diz Lesquex choses lidiz evesques Guiz avoit donées et aumonées audit daien et chapitre si comme il disoient Et se lidiz evesques Guiz avoit nul droit de fié ou de rièrefié an la ville de Flori ne es apertenances ne es choses desus dites cil daien et chapitres les nous quitent sanz riens retenir à aus Et les choses que il nous baillent par eschange il nous prometent à garantir vers toutes genz an la fourme desus dite fors que de fié et de rièrefié Et est à savoir que nous devons paier chacun an au moines d'Escharlies cent sols de tournois de rantes lesquex il ont chacun an seur les rantes de Flori et anveiron cinq solz de tornois de rante qui sont deu à autre personnes chacun an seur les cens de Flori Et est à savoir que nous n'antandons pas que li dit daiens et chapitre nous baillent en ceste eschange prez ne autres choses que il eussent an la terre de Saint Morise ne es autres leus desus diz qui ne soient des conquez audit évesque Guiz Et est à savoir que toutes les choses desus dites eschangiées et baillées de nous au diz daien et chapitre nous prometons et somes tenu à garentir vers touz et faire amortir audiz daien et chapitre à nos propres couz des seigneurs des fiez auquex lidiz amortissemanz apertient jusqu'au roi de France et dou roi meisme c'est à savoir de monseigneur Droon de Mellot après pardessus dou conte de Bar dou conte de Joigni dou conte de Champaigne ou faire faire amortir et à baillier à nos couz et à nos poines lettres de l'amortissemanz au daien et au chapitres devanz diz Après il est à savoir que seize livrées de terre lesquex lidiz évesque Guiz conquist an la paroiche de Lindri de monseigneur Jehan la Biche chevalier et de Regnaut son frère qui estoient de nostre fié lesquex lidiz èvesques Guiz avoit doné en aumone audiz daien et chapitre si come il disoient demorent audiz daien et chapitre à touz jourz mais par notre acort et par notre volenté frainches et quites de tout fié et de tout riè fié e les leur amortissons dés orandroit à touz jors mais Et prometons et somes tenu a garantir quites et franches vers touz seigneurs qui riens i demanderoient par raison de fié ou de rière fié Anseur que tout il a esté acordé antre nous et loudit daien et chapitre que nous ne notre hoir ne puissions de ci en avant biens ne persones ne choses acquierre ne retenir ne à Eglini ne es autres viles dou chapitre desus dit Et se il avenoit que nous riens i aqueissiens nous lou serions tenus à metre hors de notre main dedans l'an et dedans lou jour sanz autre requeste Et se chapitres acqueroit riens ausit an notre terre de Saint Morise et des apertenances il lou seroit ausit tenuz metre fors de sa mein dedanz l'an et dedanz lou jour sanz autre requeste Et pour ces choses tenir et garder fermemant nous Humbert de Biaujeu sires de Montpancier et de Saint Morise tire ou aille conestables de France en obligons nous et nos hoirs de la terre de Saint Morise et nos biens de toute notre terre de Saint Morise quel que part que ils soient Et nous Ysabiaus conestablesse de France sa fame en obligons nous et touz noz hoirs et tous noz biens muebles et non muebles présenz et à venir quel que part que ilz soient et an soumetons an la juridition de la court de Sanz nous et tous noz hoirs quelque part que nous faciens mansion Et prometons nous Humbert et Ysabiaus sa fame par noz sairemans ces covenances à garder et que nous ne vandrons ancontre ne par nous ne par autrui et que des covenances nous leur baudrons à nos couz lettres saallees de la court de Sanz seur les covenances toutes devant dites Et leur prometons à rendre touz domaiches touz deperz que il aurient ou ferient par lou défaut de la garentie Ou tesmoing de ces choses nous avons saalées ces présentes lettres de nos seaus qui furent fetes et donées en l'an de Grâce mil deus cenz et quatre vinz et un ou mois de mai Nos vero ad requisitionem dictorum Ymberti et Ysabellis dictam permutationem et omnia singula premissa prout superius continentur rata et grata habentes volumus et concedimus []