Charter Document - 02360740
| Charter Number: | 02360740 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Agreement |
| Date: | 1248 |
| Date type: | Internal, A.D. |
| Resource Link(s): |
|
Charter:
Omnibus presentes litteras inspecturis frater Almarricus dictus abbas Regniaci et ejusdem loci conventus et Johannes de Tanleio miles dominus de Jugis salutem in Domino Noverit universitas vestra quod cum controversia verteretur ad invicem inter nos super eo quod nos abbas et conventus volebamus habere et retinere homines ad manendum in territorio nostro quod dicitur Terra Sancti Petri juxta villam de Jugis ego vero Johannes e contrario dicebam quod in eodem territorio nullus poterit retinere homines ad manendum vel habere absque mea permissione vel voluntate Tandem mediantibus bonis viris in hanc formam pacis convenimus Quod nos abbas et conventus volumus et concessimus quod idem nobilis in dicto territorio nostro prout se protendit in longum et in latum inter villam de Jugis et grangiam de Fontemoys villam construere et homines retinere ad manendum possit imperpetuum pro sua voluntate ita quod tota maior justicia dicte ville que ibi constructa fuerit sit ipsius militis videlicet de raptu furto murtro et duello Ego vero Johannes volui et concessi quod dictus abbas et conventus exceptis istis quatuor justiciis in dominio justicia forisfacto censu reditibus et in omnibus aliis proventibus dicte ville que ibidem de novo constructa fuerit et hominum qui nunc ibidem commorantur et tocius territorii ad dictam villam pertinentis medietatem habeant ex integro et ad plenum ita quod in eadem villa de utriusque partis assensu videlicet mee et ipsorum prepositus et maior instituantur qui michi et ipsis fidelitatem faciant in communi de jure utriusque partis conservando et per ipsos prepositum et maiorem tota justicia dicte ville deducetur et fiet exceptis quatuor prenominatis justiciis videlicet raptu furto murtre et duello de quibus ego Johannes facere et disponere potero per ipsos prepositum et maiorem vel per alium secundum quod mee placuerit voluntati In omnibus autem aliis proventibus dicte ville prout premissum est dicti abbas et conventus medietatem habebunt ex integro et ad plenum Item quod de ipsis levare nichil vel recipere potero quoadusque sepedictis abbati et conventui de parte sua fuerit plenarie satisfactum Hec autem omnia nos abbas et conventus Regniac et ego Johannes de Tanleio miles dominus de Jugis promisimus bona fide servaturos et contra premissa per nos vel per alium de cetero non venturos successores nostros ad idem imperpetuum obligando Ut autem hec composicio firma et illibata imperpetuum perseveret presens cyrographum sigillorum nostrorum munimine fecimus roborari Actum anno Gracie millesimo ducentesimo quadragesimo octavo mense julio