Charter Document - 02360739

Discreto viro amico suo karissimo Petro de Escancellis Senon et Aurelian baillivus Nicholaus de Alto Villare miles salutem et dilectionem Cum coram domino Gaufrido de Capella et coram vobis apud Naalliacum esset in nos compromissum ut super saisina decime de Sista inquireremus de qua erat contencio inter vener virum abbatem Sancte Colombe Senon ex una parte et venerabiles viros abbatem Pouteriarum et priorem de Sista ex altera quam compromissionem dicte partes presentes coram dicto Gaufrido de Capella et coram vobis apud Naalliacum in nos fecerunt et promisserunt dicte partes quod ratum et firmum haberent quicquid super hoc per arbitrium nostrum legitima inquisitione super hoc a nobis prius facta ordinaremus Nos diem assignavimus dictis partibus coram nobis ad crastinum quindene Pasche ad quam diem abbas Sancte Colombe personaliter comparuit coram nobis et prior de Sista de mandato sui abbatis Pouteriarum debuit personaliter interesse sicut fuit ordinatum tempore compromissionis facte quam diem assignavimus dictis partibus ad procedendum in dicta compromissione ad inquirendum super hoc veritatem Eadem die idem abbas comparuit personaliter coram nobis et dictus prior non venit sed nuncium suum ad nos misit Nos super hoc veritate legitima inquisita a probis hominibus et fidedignis et eo quod cerciores fuimus quod alias feceramus ipsum abbatem de dicta decima saisiri et maxime per Galterum dictum Armigerum tunc prepositum Senon de dimidio modio bladi ad mensuram Senon quod bladum idem prior vel predecessor ejus pro dicta decima eidem Galtero nomine dicti abbatis restituit dictum et arbitrium nostrum diximus et protulimus in hunc modum videlicet quod ex nunc in antea idem abbas Sancte Columbe esset in possessione decime supradicte unde vos rogamus ut dictum nostrum et arbitrium nostrum prolatum sicut predictum est a dicto priore de Sista firmiter teneri faciatis Actum Senonis anno Domini MCCLXXVI in crastino quindene Pasche