Charter Document - 02360726

Je Odenins de Seint Morré escuier faz asavoir à ceuz qui verront et orront ces présentes leitres que je loi et otroi et conferme l'aumone que mi devancier ont doné et otroyé por le salut de leurs anmes à De et à Notre Dame et au frères de l'église de Regni et de laquelle il ont bones leitres c'est à savoir vint solz de tornois asis sus me aue de Seint Moré sus les rentes et sus les issues de ladite eaue à rendre et à paier à tout jorsmais de celui ou de ceaus qui tendront ladite eaue au frères desus diz ou à leur commandemant paisiblement sans nul contredit chascun an le jor de la Seint Remi Et en meit le frères desusdiz en nom d'aux et de ladite église en corporel possession par le bail de ces présentes leitres Et porce que ce soit ferme chose et estable à tout jors je les ai seieillées de mon seel Ce fut fait en l'an de grâce mil deus cenz quatrevinz et cinq ou mois d'avril