Charter Document - 02360724

A tous ces qui verront et orront ces presantes leitres Guillaumes Dalemant baillies de Troies de Miaus et de Provins salut Saichent tuit que pardevant Tomas de Laingni demorant â Saint Florentin et par devant Feliset Suin clerc nos foiaux jurez et establiz à ce faire à Saint Florentin et en la chastelerie de par nous de l'actorité de nostre seigneur le roy de Navarre vint en propre personne Estiennes diz li Bonaz de Melligni escuiers et requenut de sa bonne volanté sans force et sans barat que com Il eut descort antre lui et religieux homme labé de Pontaigni pour cause de Guiart le fil feu Quarré de Sooilli ou quel Guiart li diz escuiers metoit chaloinge et débat anver le dit abé et disoit li diz escuiers que cil diz Guiart estoit ses hons taillables et espletables an la vile de Sooilli sauf ce que li diz escuiers han avoit onques esté en saisine à la parfin et de la volanté l'abé et de la volanté l'escuier en fu acquis li diz escuiers l'anqueste feite se soufri et quita le dit Guiart comme celui où il ne pot trouver riens de son droit et se riens y avoit sia il renuncié et pour lui et pour ses hers perpétuelmant et le quite au dit abé et au couvant de tout le droit qu'il i a laquel chose il ne set pas et a promis li diz Estiennes pour lui et pour ses hers que il ancontre ceste dite quitance n'ira ne fera aler ne riens ni réciamera ne fera réclamer par lui ne par autrui ainz la garantira espécialmant anvers tous ses hers et si san obligera an la leitre l'official d'Aucerre la meilleur tenur que cil de Pontaingni auront au conseil de ladite quitance garantir et au plus grant ségurté de ces convenances dessus dites fermemant garder et tenir li diz Estienne a obligié son cors à estre prins et tenuz en prison et ses hers et tous ses biens et les biens de ses hers présens et à venir an quelque lieu que il soient muebles et non muebles à prandre à lever et à despandre comme de chose convenue en nostre cour et ne san pourroit li diz Estiennes de riens soit jusques à tant que li diz abes et li couvanz fussient plenièremant garanti et agréé des causes dessus dites et devisiées ansamble touz couz et touz domaiges que il y auroient heuz et ancoreuz pour le défaut des dites convenances aconplir des quex couz et domaiges leur certains commandemanz qui porteroit ces leitres seroit creuz par son simple seiremant sanz autre preuve Et a renuncié li diz escuiers pour lui et pour ses hers an ce fet à touz prévilaiges de croiz prinse et à prandre à toutes indulgences données et à donner à touz baraz à ce que il ne puisse dire que les convenances ne soient teles com eiles sont ci dessus dites et devisiées au droit qui dit que la général renunciacions ne vaut pas à toutes autres exceptions barres et deffansses de fet et de droit qui audit escuier pourroient aidier et nuire au dit abé ou au couvant et s'an est soumis li diz escuiers an la juridicion nostre seigneur le roi de Navarre et an la nostre et an la juridicion de nostre successeur qui sera bailliz de Troies Ou tesmoin de la quel chose par le tesmoingnage de nos diz jurez nous avons mis en ces leitres le seel de la baillie de Troies sauf le droit nostre seingneur le roi de Navarre Ce fu donné an l'an de Grâce mil deux cenz quatrevinz et quatre le lundi devant Pâques Flories