Charter Document - 02360722

En non de Notre Seigneur amen An l'an de l'incarnacyon d'icelui mil CC quatrevinz et quatre ou mois de janvyer gie mestres Nicholas de Leigny lou Chastel mestres et porvoierres de la maison au malades de ce chastel et nos li frère de cele dite maison fazons à savoir à touz cels qui verront et orront ces présentes lettres que cum contanz fut entre nos par nos et par notre maison de une part et religieux hommes l'abbé et lou covant de Ponteigny d'autre part sur ce que nos disoyens en non de nos et de notre dite maison lou pré de Boy contigue de çay et de lay au terres ou foussez et au plaissiez audiz religieux estre dou propre héritaige de notre dite maison et il en affermant lou contraire deissient ce pré espartenir au droit et à la proprieté de leur monastère à la quele chose prover il montroient et presantoient lettres autantiques qui sont feites sur ce An la fin ces lettres veues et regardées deligeament et aprovées de nous en ce feit nos confessons d'un assantemant senz force et senz decevemant que nos ne avons droit ne raison oudit pré por cause de notre maison dessus dite ne par autre raison queis que elle soit eincois espartient de droiz audiz religieux et à leur monastère par que nos en nom de nos et de notre dite maison renonçons de tout en tout expressemant au plait et à la chose et à quant qui porroit nos ou noz successeurs aidyer en ce feit et nuire audiz religieux Et voulons estre contraint à garder et à tenir ceste ordenance aussi comme de chose amigié par la court de Tornuerre à très noble roy de Jhérusalem et de Sezile à cui juridicion et de ses successeurs seigneurs de Tornuerre quant à ce nos nos sometons et touz noz successeurs An tesmoin de laquele chose nos avons requis supplié et optenu que li seaux de ladite cort soit mis en ces présentes lettres sauf lou droit lou roy en toutes choses Ces feit en la présence Pierre dit de Maligno noteor juré de ladite court mestre Janhan dit dou Mex et Adan de Charny tesmoinz à ce apelez et demandez en l'an et ou mois dessus diz lou leindi apreis la conversion Seint Pol