Charter Document - 02360721

Universis presentes litteras inspecturis Gilo miseratione divina Senon archiepiscopus eternam in Domino salutem Notum facimus quod cum nos postquam in archiepiscopatu ecclesie Senon assumpti fuimus acquisierimus titulo emptionis a domicellis Petro Guillermo et Maria de Sancto Fidolio liberis defuncti Petri de Sancto Fidolio quondam militis et defuncte Agnetis dicte Contesse quondam ejus uxoris decem modios frumenti annui redditus ad mensuram Senon boni et laudabilis ad forum seu precium frumenti domini regis Francie percipiendos a nobis et successoribus nostris annis singulis imperpetuum super sexta parte que vulgariter dicitur la Malicorne quam ipsi liberi dicebant ex parte matris sue supradicte se habere et percipere in molendinis que dicuntur Regis et Vicecomitis sitis Senonis super rippariam Vanne prope abbaciam Sancti Pauli de Vanna partibilibus cum domino rege Francie et capitulo Senon quam dictam sextam partem dicti liberi dicebant et advocabant se tenere in feodum a nobis nomine archiepiscopatus Senon et movere de feodo archiepiscopatus Senon et nemini esse obligatam et de qua dictus Petrus domicellus erat in homagio nostro tempore emptionis predicte pro se et pro aliis liberis antedictis Quos eciam decem modios frumenti dicebant dicti liberi quitos esse liberos et immunes ab omni onere servicio servitute et exactione quacunque preterquam de dicto feodo et jure dicti feodi acquisierimus eciam a predicto tempore citra nonnullos alios redditus possessiones et bona immobilia nobisque de benignitate sedis apostolice ex speciali privilegio sit indultum ut partem aliquam de possessionibus reditibus et aliis supradictis acquisitis dilectis filiis capitulo Senon hac vice erogare valeamus constitutione aliqua contraria non obstante Nos pensatis dilectione et affectione quas erga dictum capitulum habemus et quas ipsi erga nos habuerunt et habent de bonorum et prudentum virorum consilio deliberatione prehabita diligenti predictis capitulo et ecclesie Senon dictos decem modios frumenti annui redditus erogavimus ac eciam donatione facta inter vivos concedimus sine spe aliqua revocandi ex nunc et imperpetuum pro nostre anime remedio et salute videlicet duos de dictis decem modiis vel valorem eorumdem pro missa Sancti Spiritus annuatim quamdiu vixerimus in ecclesia Senon pro nobis celebranda et pro anniversario nostro in ecclesia Senon post obitum nostrum annis singulis imperpetuum faciendo et alios octo modios quantumcumque se extendere poterunt pro uno pane in valore unius panum que distribui solent hiis qui intersunt magne misse distribuendo singulis diebus singulis canonicis prebendatis et dimidiis canonicis ecclesie Senon videlicet quatuor Beate Marie duobus de Thesauro quatuor Sancti Johannis et quatuor Sancti Petri altarium canonicis in ecclesia Senon duobus canonicis prioratus Sancti Salvatoris de Vineis prope Senonis qui vesperis interfuerint presentes cuilibet uno pane Nolumus tamen quod in dicta panis distributione aliquis percipiat nisi sit de personis superius nominatis et presens fuerit ad vesperas Facimus autem dictam donationem de predictis decem modiis frumenti tanquam dominus feodalis ab eisdem decano et capitulo in manum mortuam percipiendis imperpetuum et habendis Ipsosque decem modios frumenti annui redditus admortuamus capitulo et ecclesie Senon supradictis et quitamus imperpetuum pro nobis et successoribus nostris ad opus supradictum transferentes ex tunc in dictos decanum et capitulum omne jus quod habebamus et habere poteramus et debebamus nos et successores nostri in dictis decem modiis annui redditus ratione feodi supradicti seu alia ratione quacumque dicto Petro de residuo dicte sexte partis que circiter octo modios bladi estimatur in homagio nostro nichilominus remanente Promittentes bona fide quod contra erogationem donationem concessionem ad mortuationem et quitationem predictas et contra premissa vel aliquod premissorum per nos vel per alium non veniemus in futurum et ad omnia et singula premissa imperpetuum tenenda et inviolabiliter observanda nos et successores nostros obligamus et constituimus principaliter obligatos ea que auctoritate nostra in quantum possumus confirmamus Tenentur autem dicti canonici finitis vesperis immediate antequam incipiatur completorium in choro dicere quamdiu vixerimus illum psalterium Deus misereatur nostri [] Gloria Patri [] Kirie eleison Christe ele Kirie ele[] Pater noster [] Deinde dicat edomadarius Et ne nos inducas [] Salvum fac servum tuum [] Nichil proficiat inimicus in eo [] Domine exaudi orationem meam cum responsionibus versiculorum Dominus vobiscum Collecta Famulum tuum pontificem nostrum quesumus Domine tua semper protectione custodi ut libera mente tibi deserviat et te protegente a malis omnibus sit securus per Christum Post decessum vero nostrum loco psalmi Deus misereatur nostri dicatur psalmus De profundis clamavi Pro defunctis Collecta Deus qui inter apostolicos [] In cujus rei testimonium presentibus litteris sigillum nostrum duximus apponendum Datum in prioratu Sancti Salvatoris de Vineis prope Senonis die dominica post octabas festi Epiphanie Domini anno Domini MCC octogesimo quarto