Charter Document - 02360720

Nous Phelippes par la grâce de Dieu empereres de Roménie et touz tens accroissenz faisons asavoir à touz ceus qui ces présentes lettres verront et orront que nous volons et par la tenour de ces présentes lettres donons pooir à noble fame Alys de Saint Verein dame de Chaumont jadis fame de Pierre de Barres chevalier et à Eude de Barres chevalier son fil noz cousins que il puissent achater dis livrées de terre à parisis es fiés es terres et à es censives de Saint Vallérian et que il les puissent doner pour l'ames d'als à l'abaesse et au covent dou moustier de la Court Notre Dame de la dyocèse de Sans ou là où mielz lor semblera pour profit de lor ames Et nous dès orendroit amortissons et aquitons toute la raison et tout le droit que nous et nos hoirs avons ou puissiens avoir es devant dites dis livrées de terre en tele menière et en tele condicion que moustier ou église ou ciz qui tenra les devant dites dis livrées de terre soit tenuz à rendre chascun an pour reconnoissance à la devant dicte dame de Chaumont et à Eude son fil et à ses successours dis sols de parisis et la devant dite dame et Eude son fil et lor successours soient tenuz ausi à rendre chascun an à nous et à nos hoirs et à nos successours pour reconoissance cinc sols de parisis Et pour ce que ceste chose soit ferme et estable nous lor avons bailliées noz letres scelées de notre scel pendant Donné au plain de Saint Martin en l'an de l'incarnacion Notre Seignour Jésu Crist mil deus cens quatrevins et trois le premier jour d'avril de la unzeime indicion le disiesme an de notre empire