Charter Document - 02360719

Omnibus presentes litteras inspecturis curie Senon et curie archidiaconi Senon officiales salutem in Domino sempiternam Notum facimus quod cum homines vener virorum decani et capituli Senon progeniti in villa de Sociaco et manentes ibidem seu extra dictam villam de Sociaco ubicumque mansionarii essent spectantes ad villam Sociaci videlicet Petrus Boelette Gila ejus uxor odo Guichardi et autres [] Tenerentur ut dicebant dictis decano et capitulo et ecclesie Senon jugo servitutis manus mortue de mobilibus tantum et aliis redibentiis jugum enorme servitutis obtinentibus utpote manum mortuam et servitutem que vocatur Ligniers servitutem corveyearum manuum equorum et animalium trahentium servitutem oyentiarum servitutem que dicitur recet sive habitatio servitutem gallinarum servitutem de blado granchie et taillie frumenti Senonis adducendo servitutem molendi ad bannum ad molendinum dictorum decani et capituli de Sociaco servitutem mesmaritagii servitutem taillie frumenti de biennio in biennium Item cum homines illustrissimi regis Francie mansionarii in dicta villa de Sociaco scilicet Michael Textor [] eorumque progenitores et antecessores a tempore a quo non extat memoria tenerentur ut dicebant ut alii homines dictorum decani et capituli de Sociaco predictis decano et capitulo quibusdam vilibus servitutibus et coustumis quibus dicti homines ipsorum decani et capituli de Sociaco eisdem decano et capitulo tenebantur videlicet servitute corveiarum manuum equorum et animalium trahentium et servitute que vocatur recet sive habitatio et homines Thesaurarie ecclesie Senon [] videlicet Theobaldus Cormez [] ac eorum predecessores et progenitores mansionarii in dicta villa de Sociaco a tempore a quo memoria non existit ut dicebant dicti homines tenerentur dictis decano et capitulo et ecclesie Senon ut alii homines domini regis tenerentur etiam thesaurario Senon servitute taillie et servitute manus mortue et quibusdam aliis servitutibus [] quidam alii homines diversorum dominorum in dicta villa Sociaci commorantes videlicet Theobaldus Corbiaus [] tenerentur ut dicebant quibusdam servitutibus ut prenominati homines dicti domini regis decano et capitulo antedictis Prenominati omnes homines tam dictorum decani et capituli domini regis quam Thesaurarie predicte et predicti homines diversorum dominorum tam coram nobis quam coram Johanne de Milliaco clerico tabellione curie Senon jurato et mandato nostro ad hoc a nobis specialiter destinato et deputato cui quantum ad hoc et in majoribus fidem plenariam adhibemus constituti recognoverunt et asseruerunt publice quod dicti decanus et capitulum Senon attendentes quod ecclesia mater est pietatis et illa que maxime habet benigno favore prosequi libertatem que est expulsio servitutis que etiam servitus juri dicitur contraria naturali ad preces et supplicationes multimodas humiles dictorum hominum a predictis vilibus servitutibus et coustumis et aliis quibuscumque servitutibus et coustumis quas ipsi decanus et capitulum et successores sui aut ecclesie predicte a dictis hominibus dictorum decani et capituli de Sociaco hominibus dicti domini regis ac hominibus Thesaurarie supradicte ac etiam aliis hominibus diversorum dominorum predictis possent petere recipere seu modo aliquo ab ipsis extorquere manumiserunt et quitaverunt de predictis servitutibus quibuscumque et omni jugo servitutum predictarum eos scilicet eorumque liberos procreatos et omnem eorum posteritatem imposterum procreandam Et quod similiter venerabilis vir Albericus Cornuti thesaurarius ecclesie Senon ad preces et requisitionem dictorum decani et capituli et dictorum hominum suorum de dicto loco ipsos homines suos a jugo servitutis taillie et manusmortue manumisit et quitavit eorumque liberos procreatos et omnem eorum posteritatem imposterum procreandam ita quod dicti homines dictorum decani et capituli de Sociaco et etiam prefati homines dicte Thesaurarie ac eorum successores et heredes manentes in dicta villa seu ubicumque sint mansionarii semper et homines dicti domini regis quamdiu in dicta villa de Sociaco erunt mansionarii dictis decano et capitulo et ecclesie Senon annis singulis in festo Sancti Remigii apud Sociacum quilibet duodecim denarios paris solvere tenebuntur hoc salvo quod maritus pro se et uxore sua tantummodo dictos duodecim denarios paris tenebitur solvere in festo supradicto sed sive marito sive uxore decedente alter superstes solvere tenebitur singulis annis duodecim denarios supradictos Et proinde dicti homines dictorum decani et capituli et eorum successores pro quacumque parte fuerint homines dictorum decani et capituli ac etiam eorum heredes et successores ubicumque sint mansionarii vel existant erunt liberi decani et capituli predictorum immunes ab omnibus predictis et aliis servitutibus quibuscumque Concesserunt etiam eisdem hominibus suis supradictis ac eorum heredibus et successoribus ut dicebant dicti homines quod deinceps absque licentia ipsorum decani et capituli ac thesaurarii seu successorum suorum ubicumque voluerint se maritent et ex nunc licentiati tonsuram possint accipere clericalem salvo tamen dictis decano et capitulo et ecclesie Senon quod dicti homines sui ab ipsis ut dictum est liberti et eorum successores in villa de Sociaco et alibi ubicumque manentes erunt ipsorum decani et capituli et ecclesie sue justiciabiles omnino nec alium dominum poterunt advocare preterquam capitulum Senonense Et similiter homines Thesaurarie predicte et eorum successores pro quacumque parte fuerint homines sui et ubicumque sint mansionarii vel existant remanebunt et erunt liberi homines ipsius Thesaurarie et erunt immunes ab omnibus coustumis et servitutibus suprascriptis Concessit etiam eisdem hominibus suis et eorum successoribus ad dictam villam de Sociaco spectantibus predictus thesaurarius ut dicebant dicti homines quod ipsi absque licentia sua seu successorum ubique voluerint se maritent et ex nunc licentiati tonsuram clericalem tamen de manu prefati possint accipere et deferre ita quod erunt justiciabiles modo solito dicte Thesaurarie nec poterunt alium dominum quam thesaurarium Senon pro tali parte pro quali erunt sui homines aliquatenus advocare Actum est etiam ut dicebant dicti homines quod dicti homines domini regis in dicta villa Sociaci manentes predictis servitutibus remotis ab ipsis dictorum decani et capituli justiciabiles modo soluto remanebunt Dicti vero homines dictorum decani et capituli in dicta villa Sociaci manentes cujuscumque sint conditionis ut dictum est liberti vel regis vel Thesaurarie vel ecclesiarum hominesque aliorum dominorum superius nominati jus habentes utendi usuariis nemorum ville de Sociaco benigno affectu unanimes considerantes et attendentes ut dicebant curialitates et bonitates grataque beneficia quas et que dicti decanus et capitulum eisdem hominibus fecerant et impenderant in premissis beneficii accepti non immemores ad augmentationem ecclesie Senon predicte pia ducti pietate ecclesie predicte et predicto capitulo remiserunt et quitaverunt in recompensationem predictorum spontanei non coacti a confectione presentium litterarum ducenta arpenta nemorum in usariis suis cum duobus arpentis pro viis et plateis eisdem ducentis arpentis contiguis juncta nemoribus dictorum decani et capituli de Sociaco ac etiam sita prout postmodum nobis retulerunt procuratores communitatis seu universitatis dictorum hominum de Sociaco a meta sita in parte superiori campi dicti Querne juncta nemori dictorum decani et capituli de l'Espoisse ex una parte et ex alia parte campo qui dicitur Campus des Corvées [] Que usuaria tenebant dicti homines ut decebant a dictis decano et capitulo in justicia ipsorum decani et capituli de Sociaco et quorum proprietas et dominium ad ipsos decanum et capitulum spectat prout ipsi homines tam coram nobis quam coram dicto tabellione confessi fuerunt et asseruerunt ut ipsi decanus capitulum de eis suam faciant omnimodo voluntatem ita quod pro residuo nemorum dictorum hominum in terra dictorum decani et capituli de Sociaco manentium quod erit ultra dicta ducenta et duo arpenta nemorum quod eis dederunt ad usuarium dicti decanus et capitulum retentis in eis omnimoda justicia proprietate et dominio dicti homines cujuscumque sint condicionis seu dominii manentes apud Sociacum in terra et justicia dictorum decani et capituli utentesque usuario dictorum nemorum dictis decano et capitulo jure dominii dictorum usuariorum quolibet anno in dicto festo Sancti Remigii unum obolum paris quodlibet hospicium modo et forma qua solvent dictos duodecim denarios paris apud Sociacum solvere tenebuntur Nec de illo residuo nemoris quod erit ultra dicta ducenta et duo arpenta quod ipsis hominibus ad usuarium concesserunt predicti decanus et capitulum dicti homines cujuscumque sint conditionis in terra dictorum decani et capituli apud Sociacum manentes poterunt aliquid vendere nec extra villam Sociaci ducere nec etiam extirpare Et si contingeret quod illud extirparent dicti decanus et capitulum de terra extirpata suam poterunt facere voluntatem Concesserunt etiam dicti decanus et capitulum dictis hominibus ut dicebant quod ipsi homines et eorum posteritas in futurum procreanda post quintum folium dictorum ducentorum duorum arpentorum nemorum et non ante absque aliqua defensione ab ipsis decano et capitulo seu eorum servientibus facienda possint animalia sua exceptis capris ibidem ducere tantummodo ad pascendum Promiserunt autem omnes et singuli prenominati homines per fidem suam [] Actum anno Domini MCC octogesimo tertio partim mense junio et partim mense julio in quorum omnium testimonium et munimen sigillis curie Senon et curie archidiaconi Senon presentes litteras fecimus sigillari anno et mense julio predictis die sabbati ante Inventionem Beati Stephani