Charter Document - 02360716

A touz ceus qui verront et orront ces présentes letres Oudarz de la Noville bailliz de Senz salut Saichent tuit que come descorz fust entre noble home monseigneur Mile sire de Noiers d'une part et les bourgois de Noiers c'est ad savoir Jehan Cappelier Milot le fil au prévost Pierre Douce Guillaume le Beguin Robin Bauduyn Jehan Alart et de Jehan de Saint Bri d'autre part seur pluseurs contenz euz entreuz espécialment d'un deffaut de droit dont li dit bourgois avoient appellé par devant notre seignor le roi de France et de pluseurs autres débaz meuz entre le dit seignor de Noiers et les devant diz bourgois Et come pluseurs fois bones gens se soient entremis de leur contenz et de leur descors appaisier et les parties fussent à une journée entre les autres auquel jour le seneschal de Champagne et autres traitèrent de la paiz et pour ce que la paiz ne se partist pas ja soit ce que ele fust mout approuchié par paroles pour ce que li sires de Noiers se excusoit et vouloit excuser por sa honeur garder que len ne la pouist blasmer dou plait qui estoit entre li et les devant dit bourgois disoit que en li n'estoit pas la paiz demourée en cele journée come cil quil vouloit plait eschiver et paiz garder sa honeur sauve et son droit Et li dit bourgois disoient que selonc ce que len leur raportoit que mout volentiers se fuissent consentu à la paiz pourparlée par le consoil de bones gens accordé sont en ceste manière c'est ad savoir que en la forme et en la manière que le séneschal de Champagne et monseigneur Henri de Saint Benaoit chevalier se recorderont du traitié de la paiz et selonc les paroles que il trairent des parties seur lesqueles ils entendirent à fere accort entre les dites parties et que la paiz se deust fere en tele manière les parties se consentent que la paiz soit entermement selonc ce que il le recorderont en tele manière que la partie qui ira contre cest accort ou fera ou contre la sentence de ceus qui seront esleu arbitre ou ordenaeur de la paiz fere entre les parties paieront deus cens marcs d'argent de poigne à notre seignor le Roi Et por ceste poigne paiz ne demeurroist pas que la paiz et la concordance ne tenist De rechief come descorz et contenz fust entre monseignor Guillaume Pyoche d'une part et les devant diz bourgois d'autre c'est ad savoir d'une letre que monseignor Guillaume Pyoche dit que il a d'iceulz par la quele letre il sont tenu à lui en sept cent livres tornois ou la entour et de pluseurs domages et despens que il demandist d'euz à avoir Et li dit bourgois disoient que de la letre ne se povoitil aidier pour une autre letre que il dient que il ont de lui et pour autres raisons et li demandoient granz domages que il leur avoit fait grand à tort pour ceste cause accordé se sont en ceste manière c'est ad savoir que ledit monseignor Guillaume et li diz bourgois se sont mis des diz contenz en l'ordenance des persones qui seront accordé arbitre ou appaisaeur dou seigneur de Noiers et des devant diz bourgois en telle manière que les letres de monseignor Guillaume à deuz seront bailliés en leur mains et autres si celes que li bourgois devant dit ont de lui se aucunes en ont qui touchent ou povent touchier les choses desus dites Et li dit arbitre ou appaisaeur oies les raisons des parties iront avant selonc ce que leur semblera que raison soit et ce quil en ordeneront et determineront pour bien de paiz chascune partie tenra fermement sur la poigne desus dite Et par ceste paiz et par ceste concordance les parties desus dites demourront en paiz de touz les contenz meuz entre eux du tens passé jusques aujourdhui Et pour ce que ceste chose soit ferme et estable nous avons sceelées ces présentes letres à la requeste des parties dou scel de la baillie de Senz Ce fu fait l'an de grâce MCCLXXX et deux le dyemanche après la feste Notre Dame en mars