Charter Document - 02360711
| Charter Number: | 02360711 |
|---|---|
| Cartulary Title: | Cartulaire général de l'Yonne |
| Charter Language: | French |
| Charter Origin: | Lay |
| Charter Type(s): | Ammortisement |
| Date: | 1282 |
| Date type: | Internal, A.D. |
| Resource Link(s): |
|
Charter:
Nous Thiebauz cuens de Bar sires de Thoci et nous Johanne sa fame faisons asavoir à touz celz qui verront et orront ces présentes leitres que nous amortissons et tenons pour amortiz sept arpenz de bois que l'an apeile Jarri Bolon que Pierre de Vaus escuiers avoit assis delez lou bois au chapitre d'Auceurre an la parroiche de Parli liquex bois est dou fié Deniset de Vaus escuier et de noz rièrefiez et louquel bois cil Pierres de Vaus tenoit an fié de Deniset desus dit et louquel cil Pierres a vendu au daien et au chapitre d'Auceurre pour trante livres de tournois si comme il dit Et volons et otroions que nous ne notre hoir ne puisseins riens réclamer des ci en avant ne demander ou bois desus dit pour fié ne pour rièrefié ne pour autre raison Ou tesmoing de laquel chose nous avons saelées ces présentes leitres de noz propres seaus Ceu fu doné an l'an de Grâce mil deus cenz quatrevint et deus ou mois de septembre