Charter Document - 02360709

Je Estienes chevaliers sires d'Arsy fait asavoir à touz ces qui verront et orront ces présentes leitres que je pour le remède de m'arme de mon père de ma mère et de touz mes ancessours ai confermé à religieuses persones l'abbé et le covent de Regny de l'ordre de Cyteaux et encore conferme le don et la vendue lesquex messires Jeoffroiz mes pères jadis sires d'Arsy leur fist ce est asavoir que il et leur gent à touz jourzmais frainchement et quitement sanz paier nule redevance nule coustume ne nule amende par toute ma terre d'Arsy et de mes hommes ainsint puissent traire et faire traire toutes menières de pierres pour le proufit de la dite yglise et que il toutes choses nécessères à ladite yglise et à ses membres puissent charroier et faire charroier par ma terre et pour ma riviére et que leur serjent puissent aler lur bestes pasturer par toute ma terre frainchement et quittement sanz paier redevance coustume ne amande le domaige rendent tant seulement Et à ce que je hai lié et obligié à touz jourzmais moy et mes hoirs et se il avenoit que aucun de mes hoirs alast encontre il seroit tenu de rendre et de restorer au devant dit abbé et covent IIII XVI livres de quoi il ont les leitres monseignour mon pére monseignour Joffroy chevalier jadis seigneur d'Arsy Ou tesmoing de laquel chose je ay mis mon seau en ces leitres qui furent faites en l'an de l'Inscarnation Nostre Seigneur mil deux cenz IIII et deux ou mois d'avril