Charter Document - 02360703

Reverendo in Christo patri domino A miseratione divina sacrosancte Romane ecclesie tituli sancte Praxedis presbitero cardinali ac preposito Chableiarum necnon discretis viris domino Anchero et Roberto presbiteris ecclesie Beati Martini Chableiarum H cantor totumque capitulum ecclesie Beati Martini predicte cum omni recommendatione se ipsos et salutem Dignum est et juris consonens racioni ut ecclesiarum statuta per eos a quibus regi habent eedem ecclesie et defendi secundum varietatem temporum et ipsarum indigentiam varientur et cum necessitas que quandoque juris vinculis est soluta compellit ad honorem Dei ipsarumque utilitatem de novo etiam aliqua statuentur Cum ergo vos pater reverende predicte Chableiarum ecclesie nostre capud nosque ejusdem ecclesie quasi membra de ipsa statuere ipsamque in suis necessitatibus defensare merito teneamur et dicta nostra ecclesia tum propter ruinam quam ad presens aliqua sui parte minatur tum propter ejusdem ecclesie novam fabricam jamdudum inceptam tum etiam propter quosdam ejusdem ecclesie capellanos in eadem longis temporibus educatos ac de bonis ipsius ecclesie nimium impinguatos talem retributionem eidem reddere cupientes qualem mus in pera serpens in gremio ignis in suis solet hospitibus exhibere qui contra nos nostram que ecclesiam quantum in eis est dominari volentes perverso unitatis ordine elato capite tamquam ingrati penitus incedere non verentur quam plures instantes paciatur onera et pressuras ad que supportenda ut decet ipsius ecclesie non suppetunt facultates volentes dictis morbis remedium salubre adhibere quibusdam nostrum absentibus ad diem veneris in crastino Sancte Crucis Exaltationis solempniter convocatos inquisito quorumdam canonicorum ecclesie Beati Martini Turonensis ac etiam perscrutato consilio peritorum propter predictas necessitates et honera supportenda congregato capitulo omnium ibi presentium accedente consensu ita duximus statuendum quod canonici qui de cetero in dicta nostra ecclesia recepientur in canonicos et in fratres nichil primo anno sive stagium faciant sive non de grossis fructibus prebende percipere valeant vel habere sed medietas dictorum fructuum fabrice predicte ecclesie cedat altera vero medietas burse capituli indigenti quam plurimum conservetur Quapropter reverende pater humiliter supplicamus vos autem dominos Ancherum et Robertum predictos nostros canonicos requirimus et rogamus quatinus dicto salubri statuto vestrum velitis accommodare consensum et in signum vestri requisiti et super hoc accedentis consensus sigilla vestra una cum sigillo capituli nostri necnon nostris videlicet magistrorum H cantoris domini A decani Sancti Urbani Trecensis Petri de Ungione Symonis de Trecis Bonaviti de Florentia Johannis de Montigniaco Odonis de Plaia Petri de Montemirabili et Thome de Vico appensis presentibus apponatis Datum et actum anno Domini millesimo ducentesimo septuagesimo nono feria sexta in crastino Exaltationis Sancte Crucis mense septembri