Charter Document - 02360702

Nous Biétrix jadis feme de noble baron Hugon duc de Bourgongne et je Huguenin de Bourgongne escuier filz de ladicte Biétrix et dudit duc Hugon faisons savoir à tous ceulx qui ces présentes leitres verront et orront que nous donnons et avons donné à nos hommes et à nos femmes demourans à l'Isle soubz nous et soubz noz hoirs seigneurs de l'Isle jusques ez bornes cy dessoulz declairées la franchise cy dessoubz nommée c'est à savoir dès la fontaine de la Réaule jusques à la rivière de l'Isle ainsi com la come porte pardessoubz Bossart jusques au chemin qui va à Annoul pardelez et autour les heez tangues à la pierre Ysambert et des la pierre Ysambert tout autour les hayes tangues à l'entrée de la Louère et dez la Louère la comme contravaul rez à rez des vignes de Sivry tangues à la croiz de Syvry pardessus les vignes de Syvry pardevers l'Isle tangues au gué dessoubs la chaucyé de Disengi et d'iqui tangues au poncel de Colmiers et du poncel tout le rup contremont jusques à l'issue du bois d'Uille en hault et du chief du bois d'Uille jusques au rup de l'estang d'Origny et qui sont dittes partir les tierces de l'Isle et d'Origny et du rup jusqu'à l'estang et de l'estang ainssin com le chemin porte tangues au rup dessoubs Saincte Colombe qui s'en va tangire an la rivière de l'Isle nous avons franchy et franchissons dedans lesdictes bosnes nos diz hommes et nos femmes demourans à l'Isle soubz nous et soubz nos hoirs seigneurs de l'Isle de taille que nous avyons sur eulx à nostre voulenté à hault et bas en biens meubles et non meubles en telle manière que cil qui porra paier quinze sols de tornois les nous paiera pour raison de la franchise et de plus ne les pouvons ne devons enfforcier ly plus pouvres ou ly moins puissans deux sols t et dès les quinze sols t jusqu'aux deux solz chascun des aultres selon ce que il aura et pora avoir en meubles et en héritaiges Et voulons que quatre personnes soyent eslys deulx de par nous ou de par nostre prévost ou chastellain et deulx de par nosdiz hommes Et cilz diz eslyz chascun an jureront sur sains evangilles en nostre main ou de nostre commandement que ilz féallement garderont nostre droit et le droit de nosdiz hommes quant à getter et asseoir ladicte franchise Et que ilz avec nostre prévost ou chastellain getteront quinze sols de tornois sur ceulx qui les pourront paier sur le plus povre deux sols de t et des quinze sols de tornois jusqu'à deux solz ilz moyenneront par leur serment à leur acient et à leur conscience sur chascun selon ce qu'il aura Et seront cilz quatre esliz de ceulx qui nous paieront la franchise de quinze solz de tornois Et sont les devant dit denier gettiez et levez en tel point qu'ilz soient payez à nous ou à nostre commandement chacun an huit jours devant la fête de Toussains et des adont pour le deffault de ce que nous soit paiez nous porront gaigier et exploictiez jusques nous soyons paiez Après nous octroyons et quittons à nosdiz hommes et femmes et à leurs hoirs demourans à l'Isle soubz nous et soubz nos hoirs seigneurs de l'Isle la mainmorte que nous avions sur eulx avant ceste franchise en meubles et en héritaige en telle manière que nous voulons et octroyons que de celles ou de ceulx qui en ladite franchise mourront sans hoirs de leur corps les plus prouchain ou les plus prouchaine parens qui par droit doivent ou devront hériter ayent leur eschoite et leur descendue en toutes choses meubles et héritaiges que li mort quelque part que il morra aura dedans les bosnes de ladite franchise en tel manière que li diz parans ou parant qui auront ladite eschoite ou descendue seront de ladite franchise et y demourront et nous paieront la rente de ladite franchise si com il est contenu en ces présentes lectres Et sont ainsi com li aultres de ladite franchise Et ce cilz ou cil qui pour cause de prouchaineté ou ligneage devroient avoir l'eschoite ou la descendue de cellui ou de ceulx qui morront sans hoirs de leurs corps ne voloient estre de ladicte franchise et demourer y et faire les faiz de ladicte franchise si com il est contenu en ces présentes lectres nous voulons et octroyons que les aultres plus prouchains parens ou parent qui vouldroient estre de la dite franchise ainsi comme il est contenu en ces présentes lectres ayent l'eschoite ou descendue jaçoit ce que ilz ne soient si prouchains en lignaige Aprez se aucuns homme ou femme de ceste franchise de l'Isle fait mansion ou demourance an noz aultres villes soubz nous ou aultre seigneur ou en seignorie soubz aultre seigneur que nous par mariaige ou pour marchander nous voulons et octroyons que dès là où il sera ou demourra ou fera mansion il tiegne ses possessions et domaines qu'il aura en la franchise de l'Isle en tel manière que il ou cilz qui luy tiendra ses possessions au lieu paiera à nous ou nostre commandement ainsi com li autres demourans soubz nous en ladite franchise et fera les faiz de ladite franchise selon ce qui est contenu en ces présentes lettres Et voulons et octroyons que nostredit homme et femme de ceste franchise de l'Isle puissent leurs filles marier là où ilz porront et vouldront et vendre à ceulx ilz vouldront sauf le droit de ladite franchise sur celluy qui y acquierra ou sur ceulx qui y acquierront Et voulons que ilz puissent acquerre d'autre part sauf ce que les choses que ilz acquierront oultre les bosnes de ladite franchise sont de la condition de laquelle elles estoient devant ceste franchise Après les femmes qui viendront à mary en ladite franchise qui sans hoirs de leur corps morront voulons nous que leur eschoite adveigne et descende à leur plus prouchain parent des choses qu'elles auront dedans les bosnes de ladite franchise sauf le droit de ladite franchise si com il est dit dessus et sauve à nous et à nos hoirs seigneurs de l'Isle nostre droit nostre mainmorte sur les chouses qu'elles auront oultre lesdites bosnes de ladite franchise Et retenons à nous et à noz hoirs seigneurs de l'Isle tout le droit que nous avons pouvons et devons avoir de taille et de main morte de justice de seignorie grant et petite sur les hommes sur les femmes sur leur mex sur l'éritaige et sur les choses desdiz hommes et femmes que le prieur de l'Isle tient à l'Isle ou fignaige et es appartenances de l'Isle pour raison de l'esglise de Nostre Dame la Magdelaine de Vezelay ou que il porroit avoir et en ce mesmes et en ceste manière retenons nous sur les hommes et femmes sur les choses sur l'éritaige desdiz hommes et femmes donné comme dessus que l'esglise de Nostre Dame de Montréal a orendroit ou pourroit avoir à l'Isle ne ou finaige a ces apartenances fors que à ceulx esquelz nous avons donné esgalement ceste franchise si comme il est dessus devisé Se aucun deffor vient en ladite franchise en garentye ou en reffuge nous le sumes tenu de garentir de garder de deffendre jusques à droit Nous quittons à nosdiz hommes de l'Isle le service les actions de la faux de la fourche et du rateaul et de la rente ou de la redevance de la messerie Retenons à nous et à nos hoirs seigneurs de l'Isle à mettre le messier et retenons à nous et à noz hoirs dessusdiz les corvées des charrues si com ilz les ont acoustumé de payer ça en arriez Nous ou nostre commandement mettrons chascun an en la saison le messier pour garder les biens de nosdiz hommes lequel jurera sur sains evangilles qu'il gardera bien et loyalment leurs chouses et leurs biens et fera ledit messier le serment où moustier de Sainct George de l'Isle chascun an en la main de nostre commandement présens nosdiz hommes se ilz y veulent estre Nous octroyons à nosdiz hommes en nos boys d'Arvial leur usaige si com ilz ont acoustumé de l'avoir ça en arriez Et leur octroyons l'aubépin et l'espine en tele manière que ilz en demanderont avant congié de prandre à nostre chastellain de l'Isle Et se nostredit chastellain ne leur en done congié et ilz y fussent trovez coppant ou cuillant ilz ne doivent pas être pris à achoison de nous s'ilz pevent monstrer ou prouver suffisamment qu'ils en ayent demandé congié à nostre devant dit chastellain Nous retenons dès orendroit que s'il advenoit par adventure que aucuns de noz borgois de ladite franchise se advoue ou fait advouer par aultre seigneur que par nous encontre nous ou encontre noz hoirs seigneurs de l'Isle et face borgoisie aultre part que à l'Isle encontre nous ou encontre nosdiz hoirs nous voulons expressément dès orendroit en ces présentes lectres retenons que cilz ou cil qui ce feront tantost perdent leur bénéfice de ceste présente franchise et que les biens meubles que ils auront eschéent à nous et â noz hoirs ainssi comme y fussent avant ceste présente franchise Après nous ne povons prendre ne faire prendre chez nosdiz borgois leurs litz ne leurs gelines se n'est pas besoing que nous soyons à l'Isle ou que nous y ayons hostes Et adonc ly quatre esluz ou les troys ou les deux ou cil qui sera au lieu prendront des litz et des gelines par la ville tant com il nous en conviendra en tel manière que nous sons tenus de paier pour le lit deux deniers t et pour la geline six deniers t Li cheval de nostre hostel sont hebergiez sur nosdiz borgois pour chacun cheval payant en liiière et foing troys deniers t Nous quittons à nosdiz borgois les gellines qu'ilz nous avoient acoustumé de paier et nostre diz borgois avecques ce que dit est dessus doibvent à nous et à noz hoirs chascun an à tousjours mais au terme dessus expressé pour chascun beste trayant ung moiton avoine Et retenons pour nous et pour nosdiz héritiers toutes aultres rentes desquelz mantion n'est faicte en ces présentes lectres Et nostre devant dit borgois regracians à nous la grâce et les biens dessusdiz nous ont octroyé de leur bonne volenté sans contraincte se sont obligiez à nous que ilz mouldront à noz molins et que ilz ne puissent mouldre leurs blez à aultres molins que à noz molins Et ont voulu de leur approuve gré que cilz d'eulx qui li fera li nous amendera de cinq solz de tornois pour chascune foiz qui le fera Se nostre molins n'estoit en tel point qu'ilz ne peussent mouldre ne habonder à eaulx en tel cas ilz mouldront là où ilz vouldront sans achoison jusques ad ce que nostre molin soient en point de mouldre et de habonder à eaulx et leur mouldra l'on au vingtiesme Et nous ont octroyé nostrediz borgois chascun an à tousjoursmais ou moys de mai le ban à l'Isle à vendre noz vins Et ont voulu que nequuns aultres fors que nous et nostre hoyrs seigneurs de l'Isle ne puissent pour ledit moys vendre vin en la ville de l'Isle ne es appartenances ne en lieu de ladite franchise ne en appertement ne visiblement Et que cilz ou cil qui le feront soient en nostre amende de soixante et cinq sols de t Ces chouses dessusdites nous faisons à nosditz borgois et retenons nostre seignorie nostre justice grant et petite nostre droit nostre hoost nostre chevaulchie sur nosdiz borgois sur leurs hoirs demourant à l'Isle soubz nous et soubz noz hoirs seigneurs à l'Isle et sur leurs choses Et est assavoir que nostre chastellain nostre prévost ou nostre commandement ja pour nous au lieu pour oir les clams et les forfaiz et pour cognoistre et pour deffinir des causes et pour faire justice et droit à ung chascun d'eulx selon ce qu'il est accoustumé ça en arrier Les amendes qui avant ceste franchise estoient à sept solz t nous les mettons et trayons à cinq solz l'amende de clam et du défault à vingt deniers de t l'amende de la beste eschappée à 5 d et les aultres amendes demorront et sont tauxées adjugées et levées si com elles ont esté ça en arrier Nous establissons à l'Isle marchié le jeudy en la sepmaine deux foires en l'an une le mardy après la Penthecoste l'autre le landemain de la feste Sainct Andrier apostre Nostre chastellain nostre prévost ou nostre commandement et li quatre esliz tauxeront et admesureront les danrées de pain à vendre et adjusteront les mesures et les pintes Nous retenons pour nous et pour noz hoirs seigneurs de l'Isle l'esminaige du marchié les ventes l'essalaige du marchié et tout le droit qui y append aux marchiés et foires Ei sont tenus nostre borgois de cilz qui vendront aux marchiez de vendre et achater à la mesure du marchié en la hale que nous y avons faicte Cette franchise si com elle est dessus devisée nous promectons en bonne foy pour nous et pour noz hoirs tenir et garder fermement sans venir au contraire Et voulons et octroyons que se nos ou nostre hoirs par adventure que ja ne soit envenuz encontre que nous fussions contrains par le conte de Chanpaigne de cuy fié les choses meuvent à tenir et garder les choses si com elles sont dessus dites Cette fin de laquele chose nous la devant dite Biétrix et je le devant dit Huguenins avons mis nos seaulx en ces présentes lectres faictes et scellées en l'an de Grâce mil deux cens sexante dix neuf ou mois de juignet