Charter Document - 02360699

A touz ces qui verront ces présentes lettres nous abbés de Saint Marian de Aucuerre salut en Nostre Seigneur Saichent tuit qui nous pieceha à noble home Jehan de Seillenay seigneur de Biaumont chevalier senefiemes et feismes savoir que si homes et les gens de Biaumont avoient fait à nous et à nos genz griés injures à noz persones et domaiches à noz choses de nostre maison de Bonort es apertenences si come nous meismes recitames à Chemilli pardevant loudit seignor et fu recogneu pardevant lui de ces de la vile c'est à savoir de Jehan Auverne de Gautier lou Surre de Odin More de Robert Renier de Martin Barate de Belin de Jehan Maalon de Jehan Bouteoir de Hugue lou fil Odeeron et de Jofroy Aloe qui por aux et por tote la communeté de la vile de Baumont icées choses nous amendèrent comme cogneues et voldrent et otroièrent que nobles homs Jehans sires de Seillenay chevaliers et honorables hons maistres Anssiaus de Mailli chennoines de Aucuerre taxassent de plain et por lor bonne voulenté l'amende de ces injures et desqueles nous seroiens creu par notre escrit souz nostre seeil en nostre bonne foi sanz autre preuve et que il taxassent les domaiches rendables à nous si comme il cuideroient bien faire laquele taxacion durent dire li dit taxateor dedanz la feste de Touz Sainz nouveilemant passée Laquele chose se il ne faisoient dedanz loudit terme li home desus nommé voldrent et acordèrent et promistrent par lor foi et souz lou lien de touz lors biens por aux et por toute la commune de la vile de Biaumont obeir tenir garder et acomplir de plain et sanz contredit nostre taxacion nostre ordinacion sus les choses devant dites Et porce que li diz sires de Seillenay et li diz maistre Anssiaus n'ont riens dit ne riens acordé de ces choses nous plain consoil eu de bonnes genz et regardez di ligemmant noz domaiches disons ordonnons et pronunçons nostre arbitre seur lesdites choses en la menière que s'ansuit Premièremant nous condampnons lesdiz homes par nostre arbitre Jehan Gautier Odin Robert Renier Martin Barate Belin Jehan Maalon Jehan Bouteoir Hugue lou fil Odeeron et Jofroy Aloe en nom d'aux et de toute la commune de la vile de Biaumont à nous rendre dis livres de tornois dedans mige Karoisme prochiennemant à venir por noz domaiches et en quarente livres de tornois por les injures et les vilenies à nous faites et dites à rendre et à paier à nous ou à nostre commandemant dedanz un mois après ceu que nous les en aurons requis ou fait requérir par lou seignor de Biaumont ou par les genz lou roy de France Après por la honte et la leidure faite à nostre eglise de Saint Marian nous les condampnons à ce que chascuns d'aus face deus processions en l'esglise de Chemilli nuz piez en braies et en chemise à jor de dyemoinche dedanz l'Ascension qui vient et que il tuit dis lou jor de Pasquesflories aprochanz veingnent à Auceurre et de devant l'esglise Nostre Dame la Defors mennent antre prime et tierce tuit ensamble en braies et en chemise nuz piez eschevelez verges en lor mains et enseint veingnent à nous par devant lou chastel de Auceurre jusque devant l'esglise Saint Estienne et iqui les diz forfaiz nous amendent agenouillons enseur que tout nous lor enjoingnons que dedans Pasques aprochanz il se facent assoldre comme il soient escommenié de droit escrit Et se ensinc estoit que il défaus fissent de ces choses faire et acomplir en tout ou en partie nos des ci et des hore les condempnons en nom de poinne et por les diz défauz en cent livres de tornois à rendre et paier à nous ou à nostre commandemant por aux et por toute la communeté de Biaumont Et à ceste nostre dit et nostre ordinacion nous requérons et souploions que vous sire abbés de Saint Père vous officiaus de la cort maistre Michiau archedyacre en l'esglise de Aucerre et vous prévoz de la Vileneuvelou Roy metiez vos seiaux avecques lou nostre en tesmoingnaige de ceste nostre présente pronunciacion Et nous abbés et officiaux desus dit et nous Jehanz de Vaulcharcies prévoz de la Vileneuvelou Roy à la requeste dou devant dit abbé de Saint Marian li quex ceste pronunciacion fist en nostre présence ou tesmoingnaige de ceu avons mis noz seiaux en ces présentes leitres avecques lou suen propre seiaul Ce fut fait et donné à Biaumont présenz lou seigneur de Biaumont et les homes desus diz requerenz ladite pronunciation en l'an de Grâce mil deus cenz sexantedis et huit lou vendredi après les huitanes de la Purification Nostre Dame