Charter Document - 02360693

Nos Jehan de Chalon cuens d'Auceurre et sires de Rochefort et nos Alaïs de Nevers comtesse d'Auceurre façons savoir à tos ces qui verront ces présantes letres que com l'abbé et li convents de Moutier Seint Jehan eussoient acheté de noble homme Guillaume de Joinville seigneur de Juley et de dame Marie de Tanlay sa fame tout cau que il avoient en la ville et ou finaige de Jous en Auceurrois por lo preis de quatre cens livres de tornois et nos devantdiz Jehan eussiens ladite terre recosse por devent gré de ligneige et eussions paié lesdites quatre cens livres t audit abbé et convent et li dis abbé et convent requist que nous entressiens en son homeige desdites choses cum nobles homs Miles sire de Noyers lor eust doné en pure et perpétuelle aumone audit abbé et au conveni lou fié des choses dessusdites si com il appert par les letres dou devant dit seignor de Noyers et nous ne vousissions mie entrer en l'homeige doudit abbé et dou convent pour si pou de chose nos façons à savoir à tos que nous avons eu et receu arriers doudit abbé et dou convent les dites quatre cens livres de tournois et lour avons ladite terre randue quité et délivré et tout ce que nous y avons et poons avoir pour la reison de ladite rescosse ou por aultre reison sauf çou que nos retenons por nos et por nos hoirs à nos hoirs permenablement nostre garde es choses dessus dites Et porce que ceste chose soit ferme et estauble à tousjours nos li devantdiz cuens et la contesse avons mis nos seauls en ces presantes letres Çau fu faict l'an de Grâce courant par mil dou cens et sexante et seze ou mois d'octobre