Charter Document - 02360692

A tous ces qui verront ces présentes letres Gauchiers de Merri chevaliers sires de Merri et de Bessi salut an Nostre Seignor Sachent tuit que je ai doné otroié et quité à touz jours mais à l'abbé et au convent de Reigni toute ma mitié des dîmes que je avoie commune avec l'abbé et lou convent desusdit sanz rien retenir es dîmes de la Ripe de Maulpertuis et de la châtelerie de Maillilou Chatiaul Et lour ai doné otroié et quité si com il est desus dit tout lou droit que je avoie es diz dîmes ne povoie demander au leu de cent souz que madame Mabile ma tante dame de Bessi lour avoit donez et assis sur sa partie de l'eau de Bessi et an leu de trante et sis soz que messires Gauchiers Bridaine lour avoit donez et assis sus ses rantes d'Eschimili Et promet an bone foi que je ne vendrai jamais por moi ne por autrui ne ferai venir ancontre lou dit don et la quitance de tout lou droit que je avoie ne povoie avoir an touz les dîmes des leus desus nommez Et lor garantirai et deffendrai vers touz Et à ceu faire et tenir à touz jours je oblige moi et mes ors Et pour ceu que ce soit ferme chose et estauble à tous jourz je ai seelées de mon seaul ces présentes lettres qui furent faites an l'an Nostre Seignor mil deus cenz sexante et seze ou mois de setembre