Charter Document - 02360682

Ge Jehans de Chalon sires de Roichefort et cuens d'Auceure et ge Aaliz de Nevers contesse d'Auceure fame audit Jehan fazons savoir à tous caus que ces présantes lettres verront et orront que nos avons otroyé de nostre bone volanté à madame Agnès la dame de Brageloigne et à ses hoirs que il puissent vandre et amortir à quexque genz qu'il lour plara lou porpris et la grange des Jarries et lou gaeingnaige qui i apant les quex choses sont asises ou finaige de Saint Cire et meuvent de notre rièrefié Et quant ladite dame ou si hoir osteront les choses desus dites de lour mains nos somes tenus et loons et octroions à amortir les choses desus dites se nos an somes requis Et prometons an bone foi que contre du devant dit octroi nos n'irons ne ferons aler par autre Et por ce que ceste chose soit ferme et estable je Jehan de Chalon sire de Roichefort et cuens d'Auceure desus diz et je Aaliz de Nevers contesse d'Auceure desus dite avons mis nos seaus an ces présantes lettres qui furent données en l'an de grâce mil deus cenz et sexanteet quatorze ou mois de juignot