Charter Document - 02360681

Nous Miles sires de Noiers faisons savor à touz cels qui verront ces présentes lettres que nous vendons à très noble dame Biétriz fame jadis bone mémoire Hugon duc de Bourgoigne et à ses hors perpétuelmant de nostre propre alleu franc et quitte de fyé et de rièrefyé et d'autre servitute Martin Borneau Guillemet lou fil Houdyn Droyon le filastre Huguet Johannet Pylon Perrinel le fil Perreau Geber Guillermet de la Raule Robertine Constance la Brulée Guillaume Chauvet et Perreau son frère Clarembaut des Rues Tevenin Truelle Guion et Guillemin ses frères lou tort Gomart et Perreau le Bougat et tous lor més et les appendises de lor més et tous les homes avec lor tenement et tous les droiz que nous avons à Lucy et es appartenances an prés an vignes an terres et an toutes autres choses et toutes les choses desquels nous estiens saisy en la dite ville de Lucy et es appartenances au jor de la date de ceste lettre am plain sauz touz nos bois qui nous demorent fors le bois que lon appelle le bois Ganelon que nous vendons à ladite dame en justice et en seignorie et se nous avons fyez ne rièrefyez en ces apartenances nous les retenons et la garde de l'abaye de Marcily et vendons à la dite dame le bois que l'on appelle Percours lequel nous disiens avoir en la dite vile C'est à savoir que si li home à ladite dame vouloient venir desus nous nous les povyens retenir et ele les nos ansimant por dous cent livres de tornois lesquels nous avons receus de ladite dame en pécune nombrée et nous desvetons desdites choses et en revestons ladite dame por li et por ses hors et volons et octroions que s'il avenoit per aventure que rescousse fut faite de la terre de Lucy que li homes de Lucy et toutes les choses vendues fuissent en tel estat et en tel condition com il estoient au jor que ladite vendue fu faite et se la rescousse desus dite estoit faite ladite dame et li homes de Thori retiennent tout le droit qu'ils avoient ou povoient avor en quelque manière que ce fust ou bois de Hervial que l'on appel le bois communal qui part à l'abbé de Saint Martin d'Oston et es enfans au prévost Hemery de Avalon Prometens per nostre seirement donné corporelment sus sainte évangile à tenir et à garder la dite vendue à tous jor mais sans corrumpre ne venir en contre por nous ne por autrui en jugement ne dessors ains garantirons la dite vendue à ladite dame et es suens vers tous chalongeors jusques à droit et anlions à ces choses tenir et garder à ladite dame nous et nos hors et nos meubles et non meubles et en requérons à nostre seignor lou roy de France ou à son baillii de Sens qu'il nous contraigne à ces choses tenir ausy com per chose jugée par droit par devant euss et à nostre redoté père l'avesque de Langres qu'il nous contreigne per poyne descomenyemant et devant dites choses tenir et garantir En tesmoing de laquel chose nous avons mis en ces lettres notre seaul Ce fu fait en l'an de Nostre Seignor mil dous cent soixante et quatorze ou mois de Jung