Charter Document - 02360671

A touz cels qui verrunt ces présentes lettres je Miles chevaliers sires de Noiers et je Elissenz fame à celui Mile dame de Noiers salut en Notre Seigneur Nous faisons à savoir à touz que com mariages fust porparlé à faire de nostre chier fil l'ainz né Mile de Noiers chevalier et de noble damoiselle Marie de Créci nièce à noble baron Jehan de Chasteillon conte de Blois et seigneur d'Avenes et à honorable père Erart évesque d'Aucuerre par la grâce de Dieu nous pour que le cil mariages se feist plus seurement et sans péril de contanz fors familiames et meismes fors de nos mains de notre avoerie de nostre maimbor et de notre garde tout premièrement nos deuz fiz c'est à savoir celui Mile desuz diz et Jehan le moins né et les feismes de lor lige pooir et de lor propre volenté come cels qu'estoient de léaul aage à issir fors d'avoerie aus présenz volenz requérenz et consentenz que il fussient fors d'avoerie En après por ce que contenz ne manière de discorts ne poist estre entr'aus après nos décès dou partage et de la succession de nos biens hérietez et conquestez nous les partimes et lor feismes aus présenz requerenz volenz et consentenz partie et devise après nos décès à chascun par soi de nos biens héritez et conquestez en la forme qui sensuit ce est à savoir que nous vossimes et devisames que cil devant diz Miles nostres fiz ainz néz et li hoir de son cors eussient por lor partie lou chastel et la forterece de Noiers avec toutes les apartenances qui appartiennent et apendent à cel chastel et à la chastelerie en viles en terres en homes en plains en bois en rivières en justises en seignories granz et petites en rentes en issues en touz preuz qui pooient venir par raison des choses et de persones Ce est à savoir lou bourc et la vile de Noiers qui est desous lou chastel la vile de Corz la vilede Clavise Montet Agnai Perreigni Arton Monlai Richebourc les forez et les molins les gueaigneries les prez les rivières les tierces les costumes les censives les justises les seignories granz et petites les bans les paages les prévotés les tailles touz les fiez et les rère fiez que nous avons en ces leus et en ces viles desus dites et es apartenances en quelque manière que nous les aions Encor à tout ce la vile de Sainte Vertu Yreor tout ce que nous avons à Chablies et es apartenences tout ce que nous avons à Venousse tout ce que nous avons à Soolli et es apartenences cinquante livres de tornois que nous avons chascun an en la borce le roi de Navarre vint et cinc livres de tornois que nous avons chascun an ou festaige de Tornoerre tout ce que nous avons à Vilers les Auz touz nos bois d'Erviaul touz ce que nous avons à Lucei tout ce que nous avons à Jous tout ce que nous avons à Vermentom tout ce que nous avons à Sacy et généralement toutes droitures toutes redevences que nous avons ne poons avoir ne devons par quelque raison que ce soit es leus desus nomez senz riens oster Après nous voussimes et ostroiames et devisames que Jehanz nostre fiz moins nez et li hoir de son cors eussient pour lor partie de nos biens la vile et la fermeté de Maisi Til tout ce que nous avons à Vilete les forez la rivière la praerie et la gueaignerie et toutes les apertenences de ces leus desus diz quatre vinz et quinze livres de tornois que nous avons de rente chascun an en la borce lou duc de Bergoingne et la botoellerie que il soit botoielliers lou duc de Bergoingne Lesquex toutes choses il tenra en fié de son frère ainz né Milon desus dit Encores voussimes nous et ostroiames que li diz Jehan eust por sa partie outre toutes les choses desus dites toute notre terre d'Aucorrois c'est à savoir Chitri et quanque nous avons à Coene à Augi à Naingi à la Broce lou bois de Grand Mont Corgi et tout lou bois de Corgi Saint Cire et tout ce que nous avons ou bois de Vereaul soit en usage soit en forest et tous les fiez et rère fiez de ces leus desus diz quii sunt avec toute justises toutes seignories granz et petites toutes droitures et toutes redevences que nous i avoiens ne poens avoir en quelque menière que eles soient nomées sauf l'omaige desus dit à son frère l'ainz né Sauf ce à celui Jehan que se li dus de Bergoingne avoit raison ou cause par quoi li sires de Noiers ne poist metre fors de sa main Maisi ne les apertenences i cil li Miles ains né seroit tenuz audit Jehan par son sairement à asseoir et à assener en sa partie desus dite autant de terre à la valor com les apartenences de Maisi vaudroient ou tam com les choses vaudroient que li sires de Noers ne porroit mettre fors de ses mains senz la volenté lou duc Et est à savoir que cel partaige desus dit nous lor avons fait et devisé à avoir après noz décès en tele manière que nous tenrons toutes ces choses tant com nous vivrons Fors noef cens livrées de terre que nous prometons sommes tenus à bailler à délivrer et à asseoir à maintenent a celui Miles à tenir à noz vivens Lesqueles doivent estre assises au regart de deus chevaliers desquex li diz coens de Blois ou li evesques d'Aucuerre devent diz i metroient l'un et nous l'autre Et se il avenoit ensinc que cil Miles nostres fiz mourut don Dieu lou gart avent de nous ladite Marie de ces noef cenz livrées de terre auroit cinc cens en douaire et la maisom de Corgi des quex nous la doons des or an droit pour notre fil tant com nous vivrons seulement Et après nos décès elle auroit en doaire toute la moitié de la terre et de toutes les choses qui sunt desus devisées à celui Miles em partie sans la forterece dou chastel de Noiers desus dit De laquele moitié nous la doons par tel que ele n'aura pas lors les cinc cenz livrées de terre ne la maison de Corgi Ainçois revenra lors la maisons de Courgi à la partie de celui Jehan sauve lou doaire à notre chiere fame Elissent desus dite et sa partie des conquez que ele tenra toute sa vie Après nous faisons à savoir à touz et tesmoignons que la costume la conditions et li usaiges dou chastel et de la chastelerie de Noiers jugiée et aprovée plusors fois entre chevaliers et borjois est tex Que ce qui doit eschoir de costé ou avenir de descendue de père ou de mère à aucun fil vivoit se il moroit avant ce que cele descendue ou cele escheoite li fust avenue et il eust hoir de son cors il avenroit ou escherroit ausinc bien à son hoir de son cors com à lui se il vivoit tout jeust il plus près que li hoirs ne seroit Et pour ce que nous volons oster tout descort et tout contanz qui porroit avenir nous voulons et ostroions que se il avenoit que cil Miles moreust avent nous laissanz hoir de son cors son frère Jehan ou aucune de noz filles seurvivens i cil hoir qui seroit demorans dou cors doudit Mile nostre fils auroit toutes ces choses lesqueles nous li avons devisées em partie tout ainsinc com li diz Miles les eust se il nous seurvesquist Et se il avenoit que li diz Miles notres fiz ainsnez moreust avent que nous ou avent l'un de nous laissenz hoir de son cors notre fil Jehan lou moins né seurvivent et il ou aucune de noz filles demendesient après noz décès aucune chose par raison de saisine ou d'éritaige come plus prochien ou par autre raison es biens qui sunt desus devisé à celui Mile et à ses hoirs em partaige et neessient que la costume la conditions et li usages dou chastel et de la chastelerie de Noiers ne fust tex com nous avons desus dit et en venissient encontre nous volons ordonnons et commendons et en oblijons noz hoirs et nostre héritage que si tost que li dis Jehanz ou aucune de noz filles ou li hoirs d'aus venroient en tout ou em partie contre ce partaige ou encontre l'ordenence desus dite ne demenderoient riens es choses desus dites qu'ils soient tenu à paier et à rendre por nom de poine quarante mile livres de tornois à ladite Marie ou aus hoirs de son cors de celui Mile avent que il fussient oi de ce qu'il voudroient demender et voulons encor que cil qui venroient encontre perdent tout ce que il ont ne devroient avoir de notre succession ou de noz biens et que il viegne aus hoirs dou cors de celui Mile et de cele dite Marie Après nos faisons à savoir à touz que ce partaige les condicions les covenences les obligations les recognoissences qui sunt desus dites nous les avons faites voulues et ordonées à boen apensement et de notre propre volenté senz fraude et senz malice et de la volenté audit Mile et audit Jehan et les prometons par notre sairemant doné sus sainte évangile à tenir et à garder et acomplir si com eles sunt desus dites et a non venir encontre par nous ne par autrui et en oblijons nous et noz hoirs et notre héritaige Et toutes ces meismes choses Miles et Jehanz notre fils desus dit fors familie et fors d'avoerie et de léaul aaige si com il est desus dit voudrent et otroièrent et se tendrent à paié de noz biens après noz décès chascuns por les choses qui li sunt desus devisées en ce partaige et les promistrent par lor sairemenz donnés devent nous sus sainte évangile à tenir et à garder et à non venir encontre par aus ne par autrui Et reconut lidiz Jehanz par devent nous que la costume la condicions et li usaiges dou chastel et de la chastelerie de Noiers est tiex com il est desus dit Et renonça par son sairement à tout droit à toute costume et à tout usaige contraire Et pour ce que toutes ces choses desus dites soient plus fermes et plus estables nous prions requérons et supplions tant com nous poons à nostre très haut seignor Phelippe par la grâce de Dieu roi de France que il doint en son seel lou transcrit de ces noz letres présentes et que il contraigne nous et nos hoirs à tenir et à garder toutes ces choses desus dites se nos ou il en venoiens encontre Et ausi prions et requerrons nostre chier seignor Henri par la grâce de Dieu roi de Navarre conte de Champaigne que il doint ensi en son seel lou transcrit de ces noz presentes lettres et que il contraigne nous et noz hoirs à tenir et à garder quant aux choses de son fié qui cheent en ce partaige Et encor à tout ce nous oblijons nous et nos hoirs et sozmetons en la juridicion de la cort d'Aucuerre et de Laingres ou deus ensenble et à chascune par soi à garder à aconplir et à parfaire toutes ces choses desus dites Et en tesmoignage de verité de toutes les choses desus dites je Miles desus diz sires de Noiers de ma propre volenté et dou consentement et à la requeste à mes deux filz desus nommés ai mis mon seel en ces présentes lettres Et pour ce que je Elissenz desus dite dame de Noiers n'ai point de seel je ai requis et prié dou consentement et de la volenté mon seignor et mon mari desus dit à sage home l'official de la cort d'Aucuerre que il mete lou seel de sa cort por moi en ces présentes letres Et nous officiaus de la cort desus dite avons mis lou seel nostre cort en ces présentes letres avec lou seel au seignor de Noiers desus dit à la requête de la devant dite dame et de son seignor en tesmoignage de vérité Li quex sires et la quele dame reconurent par devant nous que toutes les choses contenues en ces présentes letres estoient veraies Et ce fu fait en l'an de l'incarnation Nostre Seignor mil deus cenz sexante et onze ou mois de février