Charter Document - 02360670

Nous Henris par la grâce de Dieu rois de Navarre de Champaigne et de Brie quens palazins à touz ceus qui verront ces présentes letres salut an Nostre Seigneur Nous fesons à savoir à touz que nous avons veues et oies les letres à nos amez et féaus clers maitre Thomas Brunel et maitre Adam de Grés seellées de leurs seaus et du seau Johan seigneur de Trichastel chevalier an la forme qui s'ansuit Nous maitre Thomas Brunel et maitre Adam de Grès clerc notre seigneur lou roi de Navarre establi de par li à arrêter et saisir les acquez feiz des abbaies des eglises ou des bourjois an ses fiez et an ses arrièresfiez et establi à finer vers touz ceus qui aucunes choses i auront aquis fesons à savoir à touz ceus qui ces présentes letres verront que come nous de par l'autorité et lou povoir que notre sires li rois de Navarre nous a doné eussions feit arrêter et saisir an la mein notre seigneur lou roi toutes les choses et touz les biens que li abbés et li convenz des Eschallyes de l'ordre de Citiaus de la dyocèse de Sanz avient aquis ou par achats ou par aumône ou par autre menière quel qu'il fut es fiez et es arrièresfiez es censives ou es aluez notre seigneur lou roi de Navarre et les choses devant dites nous deissiens partenir à la droiture notre seigneur lou roi pour ceu que eles avoient été aquises an ses fiez et an ses arrièresfiez sans son seu et sanz sa licence li abbes et li convent devant dit pour tenir les devant dites choses perpétuemant et pardulablemant an meinmorte à toujours com pacefié et finé à nous pour cinc cenz livres de tournois desquels nous nous tenons à paie ou non notre seigneur lou roi devant dit et par ceste finance feite à nous de tele summe d'argent par l'autorité de lou pouvoir que nous avons de par notre seigneur lou roi de Navarre nous otroions au devant noumé abbé et au couvent de Escharlyes à tenir an meinmorte à touzjourz touz les biens que il ont aquis pour aumone ou par achat par eschange ou par autre menière es fiez et es arrièresfiez es censives ou es aluez notre seigneur lou roi de Navarre jusque au jour que ces letres furent feites Et nous prometons an bone foi comme procureur et an non de procureurs que nous procurerons et metrons poine à notre povoir que les choses devant dites soient confermées et saalées dou séal notre seigneur lou roi aussitost comme Dieus li donra retorner de son pélérinaige Et à ceu nous otroions nos come procureurs sauve la garde notre seigneur lou roi es aquez dessus diz tele comme il li doit avoir Et que ces choses desus dites soient fermes et estables à touz jours nous avons ces présentes letres saalées de nos seaus et gie Jehans sires de Trichastel garde de Champaigne et de Brie attendanz et regardanz ceste chose estre profetable à mon seigneur lou roi de l'autorité et dou povoir que mes sires li rois de Navarre ma doné vuil et otroi toutes ees choses dessus dites einsint comme elles sont devisiées et la finance einsi come ele est feite et accordée par les maitres devant nommez Et an tesmoing de ceu gie ai mis mon séal en ces présentes letres avec les seaus des devant diz clers monseigneur lou roi de Navarre Thomas et Adam Ce fut feit l'an de l'Incarnacion Notre Seigneur mil et deus cenz et sexante et dis ou mois de décembre Et nos Henris par la grace de Dieu rois de Navarre de Chanpeaigne et de Brie cuens palatin tous les biens et toutes les choses que li abbez et li convenz de Escharlyes de l'ordre de Citiaus de la dyocèse de Sanz ont aquis par aumône ou par achat par eschange ou par autre menière quel qu'ele soit an nos fiez et an nos arriêre fiez an nos censives ou an nos aluez et toutes les choses desus dites einsi come eles sont devisiées et la finance einsi come ele est feite et accordée par les maitres devant nommés volons loons confermons et otroions aux devant dis religieus et à leurs successors à perpétuité à tenir an meinmorte sans rapeler Et pour ceu que ces choses soient fermes et estables à touz jourz nous avons feit ces letres saaler de notre seau Ce fu feit an l'an de l'incarnacion Notre Seigneur mil et deus cenz et sexanteonze ou mois de février