Charter Document - 02360665

Nous mestre Thomas Brunel et mestre Adam de Grès clers notre seigneur le roy de Navarre establiz de par li à saisir et à arrester les acquests faiz en ses fiefs en ses arrièrefiefz en ses censives et en ses aleuz et à finer sur ces acquests faisons à savoir à tous cex qui ces présentes lettres verront et orront que nous de l'auctorité et du poeir que nostre sires li roys de Navarre nous a donné voulons et otroions que li abbez et li couvenz de Pontigny de l'orde de Cytiaus aient et tiegnent perdurablement en mainmorte à touz jours sauf le droit d'autrui trois muis d'avoine que messires Thiebauz de Plancy et Jehan de Hervy escuiers leur ont donné à prendre ou finaige de Courcelles Et je Jehanz sires de Trechastel garde de Champaigne et de Brie de l'auctorité et dou pooir que messires li roys de Navarre m'a donné le vueil et l'ottroy Et en tesmoing de ceste chose je ai mis mon scel en ces présentes lettres avecques les seaux au devant nommez clers monseigneur le roi de Navarre Thomas et Adam Ce fut fait à Saint Florentin le samedi prouchain amprès la feste de Touz Sainz en l'an de gràce mil dueus cenz et seixantedix