Charter Document - 02360662

Au nom dou Père et dou Fiul et dou Seint Esperit l'an de l'inquarnacion Nostre Seignor mil deus cenz seixante et dis lou jor de la Nativité Sein Johen Baptistre saichent tuit que con je Erarz sires de Valeri cogneitables de Chanpeigne aie fait mun testament an mun pais ouquel je ai ordené de mes choses à ma volenté je vuil que icil testamenz soit fermes et estables et ne vuil pas que por ce don que je fes con il est ci desouz devisiez que nule chose de mun devant dit testament soit mué ne apetisié mes ci an droit je vuil ordener de touz mes mobles que je ai avec moi ne que l'an me doit ou doi avoir por la reson de ce veiaige de oustremer où je suiz meuz [] Et premièrement je don à Jofroi Boichart escuier cinquante livres tornois et lou cheval que il a Et à Perriau de Coreilli cinquante livres et lou cheval que il a Et à Johennin de Digni cinquante livres et lo cheval que il a Et à Guillermin Dunevile cinquante livres et lou cheval que il a Et à Johennet de Paci cinquante livres et lou cheval que il a Et à Chevillat cinquante livres et le cheval que il a Et à Herrit de Turies quarente livres ou lou cheval que il a louquel que il mieuz amera Et à Valun quarente livres ou lou cheval que il a lou quel que il mieuz amera et se il avenoit que aucuns de ces sis escuiers devant diz c'est à savoir Jofroiz Boicharz Perriaus de Coreilli Johenz de Digni Guillemin de Uneville Johennez de Paci et Chevillar s'an alesent avant que il eussent faite lor année je vuil que chacuns de aus ne eust que sun cheval ou les cinquente livres lou quel que il vouldroient et se il voloient demorer à la Terre Seinte por un an je vil que il aient chacuns son cheval et les cinquente livres de restor Et si Avaluns et Herrit s'an voloient aler avant que il eussent lor année perfaite je vuil que chacuns de aus ne eust que vint livres por aler an lor pais et se il demoroient lor année je vuil que il aient chacuns sun cheval ou quarente livres si con il est dessus dit Et de rechief je don monseignor Johen de Revillon deus cenz livres et se ses chevaus moroit que il an ait sexante livres por sun cheval Et que se aucuns de me compeignons s'an voloit aler an sun pais et ne voloit servir toute sa année là où je l'establirai ou cil qui por moi serunt je vuil que l'on lor paie de tant de tans con il auront deservi et se il avoient eu plus que il n'auroient deservi que il lou rendessent à cel ou à cels qui seroient au leu de moi establi et se il voloient servir l'année entérine que l'an les teigne lor convenances Et de rechief je donne à Thierris mun conz vint livres et à Roul sun compeignon vint livres et ou paige de Vilebogis vint livres et à Pierre de Mante dis livres et à munseignor Jofroi lou preste vint livres et à Perriau lou clerc vint livres et à Jofrun de ma chanbre XL livres et à Lasnier dis livres et à Guarin de la boteillerie dis livres et à Bataille de la cuisine cent solz Et à Robin sun conpeignun cent solz Et derechief à chacun des garçuns qui sunt à moi au chief cinquante solz Et ou maire dis livres Et derechief je vuil toutes ces choses desus dites paiées avant je don tout le remenant et touz mes mobles soit an or ou argent ou vaisselmente an juaus en chevaus an armeures et an detes soit dou roi ou de autrui an quelque chose que ce soit que je aie por ce veaige ne qui à venir me puissent à monseignor Pierre de la Foiche et se il defailloit de celi Pierre devant dit chevalier por mort ou por ce que il s'an alast je don ces choses devant dites à monseignor Hue de Conflant mareschaut de Chanpeigne au leu de monseignor Pierre de la Foiche si con il est devant contenu et se il défailloit de ces deus chevaliers desus diz c'est à savoir de monseignor Pierre et dou mareschaut je don toutes ces choses munseignor Balduin et munseignor Raul sun frère de Vandières chevaliers à aus deus ansanble ou à l'un tout seul se li autre ni estoit ou si con il est devisié desus de monseignor Pierre de la Foiche et de monseignor Huun de Conflant chevaliers devant diz et si vuil que cil qui ces choses aura ausé de moi soit tenuz à servir monseignor lou roi de Navarre ou celi ou cels qui seroient an leu de li ansi con se ge i'estoie présenz Et derechief je vuil que se li rois devant diz ou cil qui demorroient an sun leu ne se tenoient à paié dou servise à celi ou à cels qui demorroient an leu de moi que l'on regardast se je auroie enploi dou suen que je n'auroie déservi et ce que l'on troveroit que je an eusse plus eu que cil qui seroit ou cil qui seroient an leu de moi li randessant ou à celi ou à cels qui seroient an leu doudit roi Et se je voie plus déservi que je n'auroie eu dou suen que cil qui seroit ou cil qui seroient an leu de moi li demandessent ou à celi ou à cels qui seroient an leu de li et receussent et que il lou meissent ou servise nostre seignor de la Terre Seinte an laquel il verroient que il seroit plus granz porfiz amainé Et derechief je vuil que se mes choses ne porroient soufire à ces choses desus dites porfaire je an oblige toutes mes choses mobles non mobles an quelque leu qu'il soient à acunplir ces choses si con eles sunt desus dites et devisiées Et à ces choses faire tenir et acunplir je establis à monseignor Huun de Conflant mareschaut de Chanpeigne monseignor Perrun de la Foiche monseignor Balduin de Vandières munseignor Raul son frère et munseignor Johen de Revillon chevaliers et Jofroi Boichart escuier à acunplir et perfeire toutes ces choses si cun eles sunt desus devisiées Ou quel tesmoin de ceste chose je ai scellés ces lettres de mon séal Et por que ceste chose soit plus ferme et estable nos Thiebauz par la grâce de Deus rois de Navarres cuens paladins de Chanpeigne et de Brie i avuns mis nostre séal à la requeste dou devant dit Erart seignor de Valeri Ce fust doné lou jour de la Nativité Sein Johen desus dit