Charter Document - 02360661

Nos Hugo dux Burgundie notum facimus quod cum discordia verteretur inter nos ex una parte et religiosum virum fratrem Michaelem abbatem S Martini Eduensis et conventum ejusdem loci ex altera super justitia et juridictione magna et parva villarum de Girolles de Tarroy de Agneolo de Annay de Stabulis Grangiis nemoris S Martini scitis juxta chatelniam et territorium ejusdem nemoris S Martini prout territorium accingitur et circuitur fossis et rivulis de Thory et de Vacy et aliorum locorum in castellania Avalonensi scitorum pertinentium ad dictos abbatem et conventum et ad prioratum suum de Avalone et appendiciarum ipsarum villarum et locorum justitiam et juridictionem ad nos pertinere dicebamus et ipsi ad ipsos supra eo etiam verteretur discordia inter nos et ipsos quod in hominibus et terra ipsorum in castellania Avalonensi dicebamus nos habere quod si homines nostri vel mulieres conjungebantur ad invicem per copulum matrimonii cum mulieribus vel hominibus prioratus S Martini Avalonensis mortuo homine vel muliere prioratus predicti heredes hominum vel mulierum ipsius prioratus ad nos insolidum pertinebant et deveniebant Denuo super eo quod ipsi religiosi asserebant homines suos posse morari seu mansionem habere in castro de Avalone absque franchisia nobis vel preposito nostro Avalonensi solvenda nobis in contrarium asserentibus [] Ut in posterum inter nos et dictos religiosos viros abbatem et conventum super premissis non possit suscitari materia conquerendi seu questionis de consensu partium extitit amicabiliter concordatum in hunc modum quod justicia et juridictio magna et parva ville de Girolles et totius territorii ejusdem ville prout protenditur late et longe usque ad viam que appellatur cheminum Bretum per quem itur a capella Vallis Oligney ad crucem de Agnelo sunt ipsorum abbatis et conventus Iterum in aliis villis terris et locis superius notatis videlicet in his omnibus que tenent in manu sua seu in dominicaturis suis iterum in hominibus suis et rebus ipsorum omnibus iterum in grangia sua nemoris S Martini scita juxta castellaniam et in territorio dicti nemoris prout superius est expressum volumus quod habeant justitiam et juridictionem magnam et parvam Concordatum est et inter nos quod heredes hereditates hujusmodi hominum et mulierum prioratus de Avalone matrimonialiter conjunctorum vel conjungendorum cum hominibus nostris vel mulieribus ipsis hominibus vel mulieribus prioratus defunctis ad nos non pertineant imo ad dictos religiosos sine reclamatione aliqua a nobis facienda licet hos inde in quibusdam locis vicinis habeamus Iterum volumus quod dicti religiosi habeant sex familias hominum in castro nostro Avalonensi tantummodo sine franchisia nobis solvenda justitia et juridictione nobis in dictis familiis remanente [] Item volumus quod dicti religiosi possint habere furcas in territorio de Girolles Volumus etiam nihil nos vel heredes vel successores nostros in rebus supradictis retinere vel habere posse nec in justitia magna et parva predictarum villarum et aliarum rerum seu locorum nec in appenditiis ubicumque sint vel existant nisi bonam et legitimam gardam pro qua videlicet in eisdem villis et locis nos vel nostri successores nihil possumus petere vel extorquere nec homines dictorum religiosorum possumus contra ipsos defendere vel in aliquo garentire licet adversus extraneos hoc facere teneamur Ipsi vero religiosi dederunt nobis pro predictis omnibus declarandis et pacificandis domum suam de S Hylario juxta Dolam cum pertinenciis ejusdem domus excepto jure patronatus Item dederunt feodum quod tenetur ab ipsis ratione domus iterum octies centum libras turonenses de quibus habemus nos pro pagatis in pecunia numerata Actum anno Domini MCCLXX mense maii