Charter Document - 02360654

Gie Erarz de Brene chevaliers sires de Venisy fais savoir à touz ces qui verront ces présentes lettres que je ai vendu outroié et quité à l'abbé et au couvent de Pontigni de l'ordre de Cistiaus à tenir touz jors franchement en mainmorte sis cenz arpenz de bois ce est à savoir lou bois sus terre e le fonz avec à l'arpant de Champaigne qui seiet ajoignant d'une part au bois de ces de Ponteigni que l'an dit la quele de Beurs et deuz cenz arpanz qui furent mon père feu Henri de Brene chevalier à les bois au seignor de Montmoranci de autre part pour mil e cinc cenz livres de tornois et ces sis cenz arpans de bois seur terre et le funt avec je suis tenuz et ai promis en bone foi à garantir audit abbé et au couvant de Pontegni délivrer et deffandre ver touz quites et frans entierement de tout fié de douère de gruerie de servaige de coustume de pensiom de paisnaige et de toute menière de usaire de bois seauz la vene pasture à ces qui devent user an cedit bois en temps convenauble ce est à savoir que en ce bois nus ne puet ni ne doit doudit bois coper ne prendre ne vif ne mort ne por édifier ne por ardoir ne cuillir herbe ne fuile ne miner en nus temps et auront li abbé et li couvent de Ponteigni la jotise doudit bois e la seignorie e il mettront forestiers à leur volanté e porront ars pourter et chacier e chiens mener et venerunt pranre e miner e leu bestes à pasturer en touz temps e toutes menières de fourfez lever e masum faire e doudit bois eppletier en toute menières com de celui qui est leur propres seaus ce que gie a retenu dudit bois à moi à mes hoir à touz jorz la grant joutise ce est assavoir lou rapt lou muttre et le larron qui por sum fait auroit déservi à perdre vie ou membre e ceste chose e jostise je ne puis ne ne doi fere ne mi hoir des renduz de Pontegni en nule menière ne des sergenz séculers qui seroient au pain et au sel de Pontegni se li dit sergent n'estoient pris au présent forfet ou quenuissent sanz destraindre e se auquns des sergenz estoit sospeanous ou criez de tel fait il seroit mis en segure garde de par l'abbé et le couvant de Pontigni et de par moi ou de par mes hoir jusque à tant que il fuit par droit délivrez ou condannez e se par avanture droiz lou condannoit au hus et au coustumes dou païs je ou mi hoir en feriens la jotise qui en devroit estre faite e se droiz le délivroit il seroit délivrez sanz délai de par les deus parties aus huis et au coustumes dou païs E est à savoir que gie ne mi hoir ne mes genz ne foretier ne autre ne poons riens prandre ne epplétier oudit bois fors ce qui apertient à la grant jotise ne por nul achoisum forches drécier ne autre chouse faire oudit bois au doumaige ne à la honte de Pontegni et ce bois cil de Pontegni pourront clourre de quelcunque clousure que il voudront et en ce dit bois gie a retenu la chace à moi et à mes hoir quant gie ou il vorront chacier sanz faire haye e sanz empirier ledit bois Et por ce que toutes ces chouses desusdites seient fermes e estables à tous jors gie les a confermées de mon seel que gie aprendre an ces présentes letres an léaul témoignaige Ce fuit fest e accordé e outreié an l'an de l'Incarnatiun Nostre Seignor MCCLXIX ou mois d'aoust