Charter Document - 02360651

Je Jehans de Néele chevaliers et je Raols ses frères escuiers faisons savoir à tous cels qui ces letres verront que nos avons baillié par eschange à nostre chier cousin Jehan seignor d'Arsies nostre moulin de Chanvres que l'on apele le moulin Brullé à tout le cors de l'eigue et tout le pâtis derière et la terre qui tient au moulin qui fu achatée de Puvilein et de sa feme et toutes les aiesances dou devant dit moulin si comme nos l'avons tenu jusques à cest jor et trois arpens de vigne seans ou terroir que l'en apele Croisilles entre la voie qui va par le vigne le devant dite de Croisilles et le moustier de Paroi en quel coron que li devans dis Jehans sires d'Arsies le velt prendre à plus bel escarrie et si li baillons toute jostice et toute seignorie sus le devant dit moulin et sus la terre et sus le pâtis devant dit et sus la vigne devant dite Et des choses devant dites nos li prometons à porter loial garantie envers toutes gens aus us et aus coutumes dou pais et à ce feire nos obligons nos et nos oirs Ce fu fait l'an de l'Incarnacion Nostre Seignor mil CCLXIX ou mois d'avril