Charter Document - 02360634

Saichant tuit cil qui ces présentes lettres verront que Guillaume par la grâce de Dieu patriarches de Jérusalem et légaz de l'apostolical Siége nobles hom messire Joffroyz de Sergines seneschauz dou roialme de Jérusalem et je Erarz de Valeri chevaliers sire de Saint Valerrein nous troi ensemble avons receu de mon segnor le roi de France quatre paire de lettres saellées de son seel de cire pendant dont il contient en l'une de cez lettres l'emprunst de trois cenz libres de tournois et en la seconde l'emprunst de sis cens libres de tournois et en la tierce l'emprunst de set cenz libres de tournois et en la quarte l'emprunst de huit cenz libres de tournois lesquelx deniers devant diz touz c'est à savoir deux mil et quatre cenz lb de tournois nous li devant dit messires le patriarches et messire Joffroiz de Sergines et je Erarz de Valeri chevaliers avons receuz por les chevaliers pélerins retenir en la Terre Sainte et avons receu l'emprunst de ces deus mil et quatre cenz libres devant diz sor les quatre paire de lettres devant dites c'est à savoir de Bencheveigne Jehan et de Bonfilz Contedin marcheanz de Senne de la compaignie de Rolant Boenseignor por feire et acomplir le comandement de mon seignor le roi de France Por coi nous prions et souplions la soue seignorie que il li diz messires li rois de France à Hugue Jaque ou à Rastor Jeinte ou à Jaque Gille ou à aucun autre de la dite compaignie qui li presentera les lettres devant dites ou le transcrit d'elles qui soit seellez dou sel le devant dit patriarche et des maistres dou Temple et de l'Opital et de mon seignor Joffroi de Sergines et dou mien vuelle feire délivrer la devant dite quantité c'est à savoir les deus mil et quatre cens libres de tournois devant diz Et je Erarz de Valeri chevaliers en tesmoignage de ceste chose ai mis mon seel de cire pendant en ces présentes lettres Ce fut feit à Acre en l'an de l'Incarnation Nostre Seigneur MCCLXVII le septisme jor de juignet