Charter Document - 02360624

Omnibus presentes litteras inspecturis frater Ammarricus de Ruppe preceptor domorum militie Templi in Francia salutem in Domino Noverit universitas vestra quod cum discordia verteretur inter nos et fratres nostros ex una parte et viros religiosos fratrem Guidonem abbatem Sancti Michaelis de Tornodoro totumque ejusdem loci conventum ex altera super decimis terrarum quas excolunt fratres nostri de Marchesoi in domo nostra de Marchesoi et super jure eligendi sepulturam in cimiterio ejusdem domus et super quadam via quam dicti fratres nostri de Marchesoi dicebant se debere habere per grangiam dictorum abbatis et conventus que vocatur Athees tandem mediantibus bonis et de consensu fratrum nostrorum dicta discordia pacificata est in hunc modum videlicet quod nos et fratres nostri tenemur singulis annis reddere dictis abbati et conventui Sancti Michaelis de Tornodoro vel eorumdem mandato ad festum Beati Martini Hyemalis in predicta domo nostra de Marchesoi unum modium bladi mercabilis frumenti et avene per medium ad mensuram Tornodori pro decimis quas habebant et habere debebant predicti abbas et conventus in terris quas fratres nostri excolunt in finagio Sancti Michaelis de Tornodoro et in finagio Tornodori ita quod ratione decimarum predictarum terrarum nichil ultra dictum modium bladi dicti abbas et conventus a nobis et a nostris fratribus possunt vel debent exigere Concesserunt etiam dicti abbas et conventus nobis et nostris fratribus quod in cimiterio dicte domus de Marchesoi possumus libere recipere ad sepulturam omnes illos qui ibidem suam elegerint sepulturam non obstante contradictione seu reclamatione ipsorum abbatis et conventus vel quacumque compositione inter nos et ipsos super hoc antefacta salvo tamen dictis abbati et conventui in omnibus jure parrochiali de parrochianis Tornodori et aliis quibus jus parrochiale habent Concesserunt etiam nobis et nostris fratribus dicti abbas et conventus viam juxta clausuram grangie sue de Athees a parte Tornodori competentem et necessariam ad currum et quadrigam Promittimus bona fide pro nobis et nostris fratribus quod contra premissa vel aliquod premissorum non veniemus per nos vel per alium in futurum Renuntiantes in hoc facto omni juris exceptioni omni privilegio impetrato et impetrando et specialiter beneficio in integrum restitutionis omni consuetudini et omnibus aliis que possent nobis competere ad rescidendum premissa vel aliquod premissorum In cujus rei testimonium et memoriam perpetuam presentes litteras de communi assensu et voluntate fratrum nostrorum sigilli nostri munimine una cum sigillo reverendi patris Guidonis Dei gratia episcopi Lingonensis duximus roborandas Et nos predictus episcopus premissa rata et grata habentes ad requisitionem dicti preceptoris sigillum nostrum presentibus litteris apposuimus Actum anno Domini millesimo ducentesimo sexagesimo quinto mense decembri