Charter Document - 02360612

Gie Miles sires de Noiers fais savoir à touz ces qui verront ces lettres que lou don e l'aumone que fist jadis messires Clarambauz sires de Noiers à l'abaie de Ponteigni des paistures et de ceu que les bestes des deus grainges de Vilers et de Aigremont puissent aler framchement à l'aisance de la rivière de Seneien et soient quites et délivrés per lou seul chatel randent se eles meffont gie vuil e otroi e conferm à touz jourz pour moi e pour touz mes hors e me succeseurs c'est à dire que l'an puisse mener lesdites bestes à ma rivière de Seneien e soient quites et délivrés per lou chatel randent se elles meffont et que l'an les puisse laver et abeuvrer et aisier en ma dite rivière quant mestiers leur sera des hors esniavant sanz contredit Et après gie vuil que tuit saichent que lou poulain que cil de Ponteigni m'ont otroié à ma vie per les covenances qui sunt entre moi et aus e lou me randent chasqun an Gie ne lou doi prendre mais que tant comme je vivrai et que cil de Ponteigni ne seront tenu à randre poulain à nul de mes hors ne de mes successeurs après ma mort eins en seront quite à touz jourz Et pour ceu que ces choses ne soient rapelées des hors ennavant ne par moi ne par autre gie en ai bailées ces leitres à ces de Ponteigni seelées de mon grand seel en tesmoiniage Ceu fu fait en l'an de Grâce mil et deuz cenz et soixantetrois ou mois de janvier