Charter Document - 02360607

Ge Ansiaus de Treignel sires de Visines conétables de Champeignes et ge Agnès sa feme dame de Visinis faisons savoir à touz ces qui verront cez letres que nos avons donné à l'iglise de Vauluisant an pardurable aumône por la salu de noz ames et de nos ancesseurs notre bois de Nooriaus que nous avons novelement retrait de l'abé de Seint Pèrele Vif de Sanz cui messires Dreues sires de Treignel l'avoit vandu mais que tant que li abes et li covant de Vauluisant nos ont quité à toz jorz à nos et à nos oirs muis de blé que nos leur devoiens chascun an seur notre molin de Somefonteine et nos dovient fere quiter de demi mui d'aveine que nos devoiens chacun an seur ce mesme molin à l'abeesse dou Paraclit et por cete chose fere plus seure nos avons baillies à l'abé et au covant devandiz de Vauluisant toutes les leitres et les asseurances que l'abe devant dit de Seint Père le Vif avoit de mon frère seigneur de Triegnel de la vandue dou devandit bois de Nooriaus et volons et otroions que les leur vaillent autant com eles vausisient à labé de Seint Père devandiz se li devandiz bois li fut demorez Et porce que cete aumône soit plus ferme et plus étable ge Ansiaus devandiz ai mis an ces letres mon seel Et ge Agnès devandite ai cete chose fianciée à tenir an la mein au doien de Sezane et promet en bonne foi et par ma foi que je contre cete aumône n'irai jamais ne par moi ne par autrui et cete chose j'ai otroiée et otroi de ma boane volanté san nule force et à ma requeste li devandiz deiens de la crétianté de Sezane a mis son séel an cez présentes letres Ce fut fet an l'an de grâce miloime ducentoime sexantedeusoime ou mois d'otoure