Charter Document - 02360606

Omnibus presentes litteras inspecturis Hugo dominus Sancti Verani et Elisabeth uxor sua salutem in Domino Notum facimus universis quod nos intuitu pietatis et ob remedium animarum nostrarum et antecessorum nostrorum Deo et Beate Marie et fratribus milicie Templi de Salice super Yonam dedimus concessimus et in perpetuum quitavimus in puram et perpetuam elemosinam motam quam habebamus prope domum Salicis super Yonam cum fossatis et aliis edificiis Item totam terram quam habebamus prope laudare inter terras dictorum fratrum Item quandam aliam peciam terre quam habebamus en Corcelles Item terras et prata eorumdem fratrum et rivum qui dicitur Rius de la Corroie Item quandam petiam prati quam habebamus en Corcelles inter terras dictorum fratrum et salicetum defuncti Tierrici Lalemant Dedimus etiam eisdem fratribus in puram et perpetuam elemosinam totam et omnimodam justiciam altam et bassam cum toto jure et dominio que habebamus et habere debebamus in predictis nichil juris nobis penitus retinentes inter magnum cheminum ferratum per quem itur ab Ulmis de Toichebef apud Vincellas et Yonam prout dicta justicia protenditur in longum et largum a justicia dominorum de Campis usque ad justiciam dominorum de Vincellis Ab ista vero donatione nobis et nostris heredibus excipimus et retinemus undecim domos sitas subtus cheminum cum hominibus in eis manentibus cum porprisiis earumdem domorum prout dicte porprisie se comportant et protenduntur a via per quam itur a Salice ad dictum magnum cheminum ferratum et a dicta via usque ad fossata Geigni Torti sicut mete se comportant a dicta via usque ad fossata dicti Geigni et per de super dicta fossata dicti Geigni usque fossatum de Coma situm juxta domum defuncti Regnaudi Pauceton sicut dictum fossatum se comportat usque ad dictum magnum cheminum ferratum Et de predictis rebus omnibus datis nos devestivimus et fratrem Petrum preceptorem de Salice loco et nomine dictorum fratrum titulo donationis et quittationis investivimus de eisdem Dicti autem fratres non poterunt in dictis locis aliquos homines nostros seu alios de cujuscumque dominio sint hospitari nec etiam retinere salvo omnibus et per omnia predictis fratribus militie Templi toto jure quod in terra comitis Jovigniaci et in terra nostra habebant tempore confectionis presentium litterarum Promittimus etiam per fidem nostram inde prestitam corporalem quod contra hujusmodi donationem concessionem et quitacionem per nos vel per alios de cetero nullatenus veniremus Immo dictas res datas garentizabimus liberabimus et etiam defendemus liberas et immunes ab omni redeventia et etiam in manu mortua erga omnes Promittimus etiam sub prestite fidei religiose quod super hujusmodi pactionibus et sub forma presenti litteras nobilis viri Guillelmi comitis Jovigniaci de cujus feodo movent res donate confici faciemus et tradi fratribus antedictis Ego vero Elisabeth de cujus capite et hereditate res predicte date movent confiteor quod hec omnia et singula una cum prefato Hugone viro meo volo facio et concedo sponte provide et discrete non decepta nec in aliquo circumventa In cujus rei memoriam et testimonium nos presentes litteras sigillorum nostrorum munimine dictis fratribus tradidimus sigillatas Datum anno Domini millesimo ducentesimo sexagesimo secundo mense junio