Charter Document - 02360600

Je Erarz de Valeri chevalier sire de Sein Vaiérien fais asavoer à to ceaus que ces présentes lettres verrount que Adam li fiz Gilet Genart a reconeu pardevant moi qu'il a baillé au prieur de Branoi perdurablement XI arpens de terre qui devont chacons arpent VI d de cens et terrage en echeinge de II setiere de blé que li priurs pernoit chacoun an sor lo devant dist Adam sor sa terre de Fouchères et en écheinge de II setiers de blé que li priurs pernoit chacon en sor madame Hersan de Fouchères Et sount séant li devant dist XI arpans de terre ou terrouer des Communes tenant au bois monseignor Adam de Vilebéoun et à la voe qui vient de Sein Valérien à Branoi à avoer et à tenir au devant dist priur et à ceaus qui por luy seront bien et en paez perdurablement e i tieu menière que je que sires suis dou fié n'y porrei riens réclaimer ne demaundier fors que la grant jotise se le i avient E je lou cete chose com sires dou fié E que cete chose soit ferme et estable j'ei fait saelliei ce lettres de mon sael Ce lettres furent faites en l'an de la Grâce M et CC et LXI ou mois de juignet