Charter Document - 02360595

A touz caus qui verront ces présentes lettres Guillaumes Motiaus bailliz de Châtiau Renart salut an Notre Seignor Saichent tuit que d'un contant qui estoit antre l'abé et lo covant d'Escharlies de l'ordre de Cîtiaus et monseignor Pierre de Prissi chevalier d'une vendue de terres et de pastures que feu Manassiers pères à ce Pierre au devant dit abé et covant d'Escharlies avoit feite sor ceu que l'abés et li covanz disoent que messires Pierres devant dit chevaliers estoit tenuz à garantir contre totes genz lesdites terres et pastures selon ceu quil estoit contenu es letres au conte de Joigni mise fust feite sor monseignor Renaut de Setpaus chevalier et sor Guillaume de Dici borjois de la Vile Nuevelou Roi que quamque il diroent de ceste chose quil seroit tenu liquel disoi lou mardi après la Seint Jaque et Seint Philipe dirent lor dist an tel meniere que messires Pierres de Prissi estoit tenuz à garantir à caus d'Escharlies les terres et les pastures devant dites laquel chose à la requeste de l'abé et do covant et des diseors devant diz j'ai salées ces letres de mon seau Ce fust faist an l'an de l'Incarnacion Notre Seignor mil CC et LX ou mois de mai