Charter Document - 02360590
| Charter Number: | 02360590 |
|---|---|
| Cartulary Title: | Cartulaire général de l'Yonne |
| Charter Language: | Latin |
| Charter Origin: | Religious |
| Charter Type(s): | Judgement |
| Date: | 1259 |
| Date type: | Internal, A.D. |
| Resource Link(s): |
|
Charter:
Omnibus presentes litteras inspecturis G divina miseracione Autissiod episcopus et frater Bernardus prior Fratrum Predicatorum Senon salutem in Domino sempiternam Dudum vir nobilis Johannes de Tociaco miles signo vivifice crucis assumpto dum ad partes Jerosolimitaneas intenderet proficisci una cum domino Ludovico Dei gracia rege Francorum illustri et aliis bellatoribus transfretantibus pro subsidio Terre Sancte nos et bone memorie Milonem tunc archidiaconum Autissiod executores deputavit et constituit in partibus gallicanis sui testamenti voluntatis seu dispositionis extreme illo palam expresso ut uxor sua et heredes ipsius nostro simplici verbo crederent in hiis que pro anime sue remedio reddenda et restituenda videremus volensque a nobis episcopo sine reliquis ageretur plenam haberet robori firmitatem Vocatis igitur coram nobis episcopo apud Monasteria in Puseya nobili viro comite Barre et nobili domina uxore ejus filia et herede domini defuncti et eciam in generali omnibus qui de dicto defuncto justam haberent materiam conquerendi receptis conquerentium peticionibus et plenius intellectis inter alios proposuit abbas Sancti Germani Autissiod nomine prioratus Sancti Salvatoris quod cum prior dicti prioratus haberet et diu fuisset in possessione pacifica habendi usuagium suum ad opus dicti prioratus in nemore de Burceyo Johannes quondam dominus de Sancto Ferreolo herbergiari fecit homines in dicto nemore et maiorem partem tocius predicti nemoris scidi et redigi fecit ad agriculturam in prejudicio dicti prioratus spoliando ipsum prioratum usuagio suo absque racionabili causa de quo ut dictum est diu extiterat in possessione pacifica Petens se nomine prioratus predicti ad predicta restitui et tandem quod ea que in peticione sua continebantur vera essent fuit juramento firmatum Demum ex parte ipsius abbatis testibus ad probandam intencionem suam productis receptis juratis et diligenter examinatis et eorum depositionibus in scriptis redactis consideratis omnibus que nos movere poterant et debebant die mercurii post festum Omnium Sanctorum continuata a die martis precedente prefixa partibus ad nostram sentenciam audiendam presente comite Barri pro se et uxore sua visum est nobis ambobus usagii antedicti possessionem vel quasi predicto debere restitui et eundem prioratum in eum statum in quo erat tempore spoliacionis a defuncto Johanne predicto facte de dictis rebus dum vivebat debere reduci ad que omnia permittenda et libere restituenda videlicet ad restituendum pacificam possessionem vel quasi priori Sancti Salvatoris nomine dicti prioratus usagii in nemore de Burceyo ad nemus viride et siccum ardendum in dicto prioratu quo usagio dictus Johannes de Tociaco spoliavit sine causa racionabili dictum prioratum dictos comitem et ejus uxorem et omnem a dicto defuncto causam habentem in rebus predictis condempnamus in scriptis et secundum testatoris arbitrium eos huic nostre diffinicioni pro salute memorati defuncti salubriter obedire jubemus Et hec omnibus quorum interest significamus per presentes litteras sigillo curie Autiss de mandato nostro sigillatas Datum anno Domini MCCL nono die mercurii predicta