Charter Document - 02360586

Je Henris chevaliers sires de Tragnel fais savoir à touz cauz qui cez letres verront que com il aust contenz et descorde entre moi d'une part et les moines de Vauluisant d'autre dou bois de Lusseint de ce que je disoie qu'il tenoient ce bois de mon père par raison de gaigière et que il en avoient bien tant levé à deus foiz qu'il l'avoient despoillié que il me pooit bien et devoit par droit demorer quites Et li moine disoient encontre qu'il avoient ce bois bien et leaument achaté de mon père par coi je ni pooie rien réclamer par droit A la parfin j'ai entendu et sau par les letres mon père et par autres letres et par vives voiz que mes pères vandi ce devant dit bois de Lusseint bois et fonz de terre et que je n'ai point de raison ou reclamer ne ou chalongier Et por ce je vuel et octroi que cil devandiz bois de Lusseint remeigne à l'iglise de Vauluisant à touz jorz sauve ma joutise et ma chace Et que ne je ne mes oirs n'i puissens jamais riens réclamer Et en tesmoignaige de cete chose j'ai mis mon seel en cez présens letres Ce fu fet en l'an de Grâce mil et II et cinquante et huit ou mois de janvier