Charter Document - 02360585

Nos Hugues dux de Borgoigne faisons sçavoir à tous céaus qui ces présentes lettres verront que con paroles fuissent de mariage de nous et de Béatrix la seror à noble baron Thiébaut par la grâce de Dieu roi de Navarre conte de Champaigne et de Brie palatin à la porfin nos sommes accordé en tel manière que li devant dit Thiébaut nous donne la devant diz Béatrix à femme et donne à sa devant dite seror por tout son partage de père et de mère de terre et de moble l'Isle dessus Montroyal et toutes les appartenances et tous les fiefs sauf le fié au signor de Noiers qui muet de l'Isle et donne à la devant dite Béatrix por son partage si com il est devant dit vingt mille livres de tornois à paier à nos ou à nostre comandement ès termes ci aprez nommés c'est à sçavoir six mil livres de tornois à ceste prochaine foire de Bar et sept mille livres de tornois à l'autre foire de Bar en suivant après et les autres sept mille livres tornois à l'autre foire de Bar en suivant Et portant nos et la devant dite Béatrix avons quitté au devant dit Thiébaut et à ses hoirs tout héritage qui ere avenuz à la devant dite Béatrix de par père et de par mère et tot le moble sauve la droicte eschoite s'elle avenoit Et s'il avenoit que la devant dite Béatrix mourust avant de nos et sans hoirs de nos et nos eussiens receues totes les dictes vint mil livres de tornois nos seriens tenus à rendre à devant dit Thiébaut ou à ses hoirs quatorze mil livres tornois en quatre années puis la mort à la devant dite Béatrix chacun an le quart c'est à sçavoir le premier quart du jour qu'elle seroit morte en un an et seroit cette paie faite à Troies et ensin chacun an continuement en tel jour et en ce leu mesmes jusqu'à tant que les paies fussent faictes et les six mille livres de tornois de ces devant dites vingt mile livres nos demereroient por les dépens et por les couz qu'elle auroit [fait] tant comme elle demorroit avec nous combien que el y demorast ou poix ou onques et quel tans que elle mourust ou tost ou tart Et se nous n'aviens receu totes les dictes vingt mille livres de tornois ains que elle mourust nos ne seriens tenu de paier fors ce que nous auriens receu outre les six mille livres Et ce que nous auriens receu outre les six mil livres nos seriens tenu à paier à quatre années prochiènes puis la mort de celi Béatrix aus termes et au leu si com il est dessus devisé Et si nos moriens avant que cil payement feussent fait nostre hoir seroit tenu à la fenir selon la forme devant dite Et s'il avenoit encore que nos morissiens ainçois que la devant dite Béatrix et elle n'eust hoir de nos vivant nostre hoir seroient tenu de rendre à la devant dite Béatrix ou à siens toutes les vingt mil livres de tornois se nos les aviens receues et se nos ne les aviens toutes receues ce que nos en auriens receu et seroient cil paiement fait à quatre années après nostre mort chacun an le quart ès termes et au leu selon la forme devant dicte Et la devant dite Béatrix a fait hommage lige audit Thiébaut de son héritage de l'Isle et des appartenances si com elles sont dessus nommées et li hoir de la devant dicte Béatrix qui tenront la terre de l'Isle dessus nommée seront tenus de faire hommage au devant dict Thiébaut ou à ses hoirs et ele mesme est tenue à faire homage de la devant dite terre de l'Isle as hoirs ledit Thiébaut se elle vivoit plus de lui et nos ne sommes pas tenu de faire hommage au dit Thiébaut ne à ses hoirs de la dicte terre de l'Isle Et nos avons doée la dicte Béatrix de quatre mille livres de terre à digenois qui li doivent estre assises à Castellon sur Seine et à la chastellerie et en Vilenes ou en Dumois et as appartenances et à Viétel et as appartenances et Cinai et en la chastellerie et se ces choses devant dites ne valoient les quatre mille livres de terre por lou pris des deus chevaliers qui mis i seroient li uns de par le dict Thiébaut et li autres de par nos elles seroient parfaictes à l'égard des deus chevaliers qui mis y seroient si com dit est devant li quel les préferoient en bone foi por l'une partie et por l'autre au plus près des leus devant dicts et en ces dicts leus de doaire nos ne poons rien retenir si ils ne valloient plus de quatre mil livres par l'égard de deux chevaliers qui y seroient mis et si plus valoient li plus ne seroient pas de doaire Et est à sçavoir que li diz rois et li hoir doivent garantir contre tous homes jusqu'à droit de l'Isle et les appartenances si com est devant dict et à nos et à la dicte Béatrix et as hoirs de la dicte Béatrix en tel manière que se ces choses ou aucune d'eles que li rois deust garentir ne poist garentir ne si hoir ils seroient tenu de faire souffisant eschange par l'égart des deus chevaliers desqueux devant est parlé et se cil fussent mort ou li uns d'eus par autres qui y seroient mis en leu des mors ou dou mort selon la forme devant dite Et en tesmoignance de laquelle chose nos avons fait seeller ces présentes lettres de nostre seel Ce fut fait en l'an de Grâce mil deux cens cinquantehuict ou mois de novembre