Charter Document - 02360584

Nous Hugues dux de Borgoigne faisons asavoir à touz ceus qui verront ces présantes laittres que por ceu estaubliz an nostre présance Regnaut de Ostum qui fu fiz monseignor Regnaut de Ostum chevalier a recogneu que il a donné et quité héritablement à Guillaume sum frère escuiers quam que il avoit es maisons de l'astor de Avalum et à espandisse qui sunt dedanz les murs de ces maissuns et a recogneu que il a vandu héritablement audit Guillaume toutes les autres choses que il avoit à Avalum c'es assavoir an maissuns oiches mex rantes et touz autres estephiz por XX livres de la monoie corantam Borgoigne de annuel rante et por dues muis de vin por laquex rante il cil Guillaumes por ce estaubliz devant nous a recogneu que il a asenez et baillié à celui Regnaut tot ses cens et ses gardes dou mont de Ylant et des dues muis de vin an ses vignes asises an ce meime mont an tel menière que si li diz Regnauz ne pooit avoir de ces cens et de ces gardes les devant dites rantes li diz Guillaumes l'a asené es autres choses que il a an ce dit mont tant que li diz Regnauz eust antérinemant sa paie desdites rantes Et cil diz Guillaumes a juré pardevant nous ces choses à garder et à tenir formement à la vie de celui Regnaut et avosques ceu cil diz Guillaumes a ostroier que se il ne si hoir venoient contre ces convenances après l'an de la desfaute il ciz Regnauz porroit tenir héritaublement les devant dites choses sanz nul contrediz Et vot li diz Regnauz que après sa mort toutes ces choses devant dites venroient à celui Guillaume et à ses hoirs perdurablement Et nous de cui fiez ces choses meuvent loons et otréons toutes ces convenances devant dites Et porceu que ces choses soient formes et estaubles nous por la requauste des parties avons nous seaulées ces presentes laittres de nostre seaul Ce fut fait an l'an de l'incarnacion Nostre Seignor mil et deux cens et cinquantehuit ou moys de juignaut