Charter Document - 02360582

Nous Oedes fiuz le duc de Bourgongne cuens de Nevers et sires de Bourbon fesons savoir à touz ceus qui ces lettres verront que entre nostre trèshaut seigneur Loys par la grace de Deu roi de France et nos avons covenances de mariage cest à savoir de monseigneur Jehen son fiu et de Yolent notre ainznée fille Et sont teles les convenances que cele Yolent aura à mariage notre terre de Danse et de Saint Aignen en Berri et de Perche et de Mongay et de Bruni et de Thorigny en Normandie o toutes les appartenances de toutes les devant dites terres et se ces devant dites terres ne valent au jour que li mariages sera fez VIIIm livres de rente à tournoais nous sommes tenu de parfere en notre autre terre avenanment Et sont onquores teles les convenances que se nous n'avions hoir masle la devant dite Yolent se tendrait à ceste terre se ele voloit et se ele voloit elle vendroit à sa droiture comme ainznée Et est onquore ainsi ordoné et accordé que s'il avenoit en quelcunques tems que li devant diz roys notre sires se dessentut de cest mariage faire ou que si devant dis Jehens quant il vendra en aage del mariage consentir ou au tems que li mariages devra estre se descentut de cest mariage faire ne li roys ne sis fiuz Jehanz ne seroient liez ne tenuz de ces convenances garder Et est à savoir que nous la devant dite Yolent notre fille devons baillier au devant dit roy notre seigneur à garder et à nourrir quant nous en serons requis de lui et quant nous li baillerons à sa requeste il nous est tenuz de baillier ses lettres pendant et que les il sera contenu que s'il avenoit que il ou sis fiuz Jehans devant diz se dessentissent de cest mariage feire si comme il est desus dit li roys ou si hoirs la devant dite Yolent seroit tenuz de rendre à bone foi à nous se nous estions en vie ou sil avenoit que nous moreussions aus parens et aux amis de la demoiselle qui seroient en vie ansi délivré et sans lien de mariage comme nous li baillerons Et en tesmoing de cette chose nous avons ces présentes letres scelées de notre sael En l'an de Notre Seigneur MCCLVIII el mois de juing le samedi devant la saint Barnabé l'apoustre