Charter Document - 02360562

Omnibus presentes litteras inspecturis nos Johanna abbatissa et conventus requie Beate Marie que vulgariter dicitur de Marcille Eduensis diocesis in Domino salutem Notum facimus universis quod cum nos in predicto loco de Marcille minime fertili multum sicco atque propter situm loci ipsius religioni minus apto substineremus incommoditates non modicas et intolerabiles evidenter venerabili patri nostro in Christo ac venerando domino G Dei gratia Eduensi episcopo significamus incommoditates predictas inter quas eidem dignum duximus declarandi quod propter karitatem nemorum et lapidum et ipsius loci inhabilitatem ad edificandum tam pauca essent edifficia quod insufficentia habitatione nostre penitus inutilia merito possent dici Addidimus etiam sine fallacie vicio significationi predicte quod aque tantus esset deffectus ibidem quod ut de hiis que coquine et domus munditie sunt necessaria taceamus aquam ex rivulo non parum a loco distanti delatam putridam et infectam fervido calore estatis pluries siti urgente bibere cogeremus qua de causa prefatum venerabilem patrem Eduensem episcopum rogamus humiliter et devote quatenus locum commoditatibus non carentem videlicet locum domum et possessiones leprosarie de Sarces sue diocesis cum omni emolumento et onere eorumdem nobis ad edificandum et ad transferendum nos ibidem pro inopia et incommoditatibus sublevandis ex paterna providentia religionis obtentu ac pietatis intuitu concedere dignaretur Idem vero pater reverendus ductus pietate nostre miserie componens de venerabilis G Dei gratia Autissiod episcopi et aliorum bonorum consilio dicta loca et domum de Sarces ac ejusdem possessiones inferius nominandas cum dicto emolumento nobis concessit ita tamen quod nos et quicumque in dicto loco de Sarces nobis successerunt tenemur in perpetuum leprosos de dicta villa et parrochia qui in dicto loco sunt vel pro tempore fuerint in dicta parrochia recipere et eisdem locum et domum ad habitandum congrua infra metas ejusdem parrochie cum omnibus necessariis congrue ministrari Juxta ipsius venerabilis patris et successorum suorum episcoporum Eduensium qui pro tempore fuerint ordinationem pariter et mandatum et eidem reverendo patri Eduensi et suis successoribus subjectionem plenariam obedientiam et reverentiam sine contradictione aliqua in perpetuum exhibere ac eisdem in omnibus que ad legem jurisdictionis ordinariam et diocesanam pertinent pleno jure subesse ita quod ipse et ejus successores habebunt in perpetuum in nos et illas que in dicto loco de Sarces pro tempore fuerint visitationem correctionem reformationem et alia omnia que ad dictam jurisdictionem pertinent et potuerint pertinere Hec autem volumus et concedimus abrenuntiantes spontanee non circumvente nec coacte omnibus privilegiis et indulgentiis ordinis Cisterciensis et nobis concessis a sede apostolico nec ipsius legatis et etiam quibuslibet litteris impetratis ac etiam impetrandis que nos possent contra predicta juvare vel nobis contra predictum venerabilem patrem Eduensem prestare subsidium vel offerre Si vero quod absit deficiemus in aliquo predictorum videlicet in receptione leprosorum de dicta parrochia vel habitationis congrue aut necessariorum administratione vel rebelles contra dictas leges excitaremus in aliquo volumus et concedimus quod idem venerabilis pater vel successores ejusdem qui pro tempore fuerint possint dictis leprosis assignare tanquam jus et proprietatem ipsorum etiam nobis contradicentibus et invitis dictam domum et locum de Sarces et possessiones inferius nominatas cum omni incremento et melioratione eorumdem et a nobis aufferre ac in eos et eorum usum tanquam ad dominum et possessorem sicut ante istam concessionem predicta possidebant pleno jure transferre Possessiones vero dicte domus de Sarces tales sunt primo dicta domus habet terras arabiles ad unam carucam in finagio de Magniaco et de Savigniaco item habet prata ad duodecim charros feni in eodem finagio item habet quatuor arpenta nemoris desuper ipsam domum item habet sexaginta operatas vinearum in monte Vailbi et quindecim in monte d'Estables et sexdecim operatas in monte de Ponte Auberti item habet quatuor solidos de censu in burgo de Avalone et unam domum in castro de Avalone In cujus rei testimonium et ut perpetuam obtineat firmitatem nos predicta abbatissa et conventus sigillum predicti venerabilis patris G Dei gratia Autissiod episcopi et sigillum venerabilis viri officialis Autissiod presentibus litteris rogavimus apponi una cum sigillo nostro presentibus eisdem appenso Datum anno Domini millesimo ducentesimo quinquagesimo sexto mense mayo