Charter Document - 02360547
Charter Number: | 02360547 |
---|---|
Cartulary Title: | Cartulaire général de l'Yonne |
Charter Language: | Latin |
Charter Origin: | Papal |
Charter Type(s): | Mandate |
Date: | 1253 |
Date type: | Internal, Calendar, Papal |
Resource Link(s): |
|
Charter:
Innocentius episcopus servus servorum Dei dilectis filiis abbati et conventui monasterii Sancti Germani Autissiod ordinis sancti Benedicti salutem et apostolicam benedictionem Ex tenore vestre peticionis accepimus quod vobis apostolica sede indulsit ut si homines monasterii vestri contingat aliquando excommunicationis vinculo innodari Autissiodorensis episcopus seu quicumque alius pro illorum absolucione potestatem non habeat ab eis pecuniam extorquendi et si forte in eos quia pecuniam hujusmodi non persolvunt excommunicationis sentencia fuerit promulgata sit irrita et inanis Hujus siquidem indulgencie non vim set sola verba venerabilis frater noster Autissiodorensis episcopus et officialis ejus servantes quando contingit predictos homines sentencia excommunicacionis astringi eis nisi solvant certam pecunie summam in vestri et ejusdem monasterii grave prejudicium absolucionis beneficium non impendunt asserentes in fraudem ipsius indulgencie se non pro absolucione set pro contumacia eandem ab illis pecuniam extorquere Quia vero pati nolumus nec debemus quod effectus privilegiorum et indulgenciarum apostolice sedis aliquis per suam astuciam seu maliciam se irritasse letetur nos vestris gravaminibus in hac parte salubriter occurrentes vobis auctoritate presencium indulgemus ut predicti episcopus et officialis seu quicumque alius sicut pro absolucione nequeunt ita nec pro contumacia possint ab eisdem hominibus in fraudem ipsius indulgencie aliquam pecuniam extorquere Nulli ergo [] Datum Perusii V kalendas marcii pontificatus nostri anno decimo